තමන් දුෂණය කලේ අනුරාධපුරේ නායක හිමි බව දැරිය කියයි.. ස්ථානීය පරීක්‍ෂණයට පන්සලට එක්ක යයි..

 අනුරාධපුර පුදබිමේ පිහිටි විහාරස්ථානයක හිමිනමක් ඇතුළු තිදෙනෙකු විසින් 15 හැවිරිදි බාලවයස්කාර දැරියක අපයෝජනයට ලක් කිරීමේ සිද්ධියට අදාළව විමර්ශන වාර්තා ඉදිරිපත් කරන ලෙස අනුරාධපුර ප්‍රධාන මහේස්ත්‍රාත් අධිකරණය (04) නියෝග කළේය.

නඩුවට අදාළ නඩු භාණ්ඩ රජයේ රස පරීක්ෂක වෙත යොමු කර එහි වාර්තාව අධිකරණයට ඉදිරිපත් කරන ලෙස මහේස්ත්‍රාත් සියපත් සසිඳු චිත්‍රමරත්න මහතා නියෝග කළේය.

විමර්ශනවල ප්‍රගතිය දැක්වෙන වාර්තාවක් ඉදිරිපත් කරන ලෙස ගම්පහ කොට්ඨාස පොලිස් ළමා හා කාන්තා කාර්යාංශයට නියම විය.

සහාකාර පොලිස් අධිකාරිවරයෙකු ඇතුළු විශේෂ පොලිස් කණ්ඩායමක් අනුරාධපුරයට ගොස් චෝදනා ලැබ සිටින විහාරාධිපති හිමියන්ගෙන් පැය තුනකට අධික කාලයක් ප්‍රශ්න කර ප්‍රකාශ සටහන් කරගෙන තිබේ.

සිද්ධිය වූ ස්ථානය පරීක්ෂා කිරීම සඳහා වින්දිත දැරිය ද අනුරාධපුරයේ අදාළ විහාරස්ථානය වෙත රැගෙන ගොස් ඇත.

නිට්ටඹුව ප්‍රදේශයේ ලැගුම්හලක සිය පෙම්වතා සමඟ රැඳී සිටියදී පොලිස් භාරයට ගත් මෙම දැරිය වෛද්‍ය පරීක්ෂණයකට යොමු කිරීමෙන් පසු ඇය අවස්ථා කිහිපයකදී දූෂණයට ලක්ව ඇති බව හෙළි විය.

ප්‍රශ්න කිරීම් වලදී දැරිය පවසා ඇත්තේ තමන් මුලින්ම අපයෝජනයට ලක් කළේ අනුරාධපුර පුදබිමේ විහාරාධිපති හිමිනමක් බවයි.

පසුව ඇයගේ පෙම්වතා සහ ඥාතියෙකු විසින් ද ඇයව අපයෝජනය කර ඇති බව අනාවරණය විය.

දැරියගේ මවුපියන් අදාළ විහාරාධිපති හිමියන්ගෙන් වරින් වර විශාල මුදලක් ලබාගෙන ඇති බව මූලික විමර්ශනවලදී හෙළි වී තිබේ.

දැරිය මේ වන විට විශේෂ ළමා නිවාසයක ආරක්ෂාව යටතේ රඳවා සිටියි.