අමෙරිකානු ජනාධිපති ඩොනල්ඩ් ට්රම්ප් විසින් ඉදිරිපත් කරන ලද සාම යෝජනාවලට ඉරානය ලබාදුන් ප්රතිචාරය සම්පූර්ණයෙන්ම පිළිගත නොහැකි බව පවසමින් ට්රම්ප් එය ප්රතික්ෂේප කර තිබේ.
සති 10ක් පුරා ඇදී යන මෙම ගැටුම තවදුරටත් දික්ගැස්සෙනු ඇතැයි යන බිය හේතුවෙන් ලෝක වෙළඳපොළේ බොරතෙල් මිල සඳුදා දිනයේදී තියුනු ලෙස ඉහළ ගියේය.
අමෙරිකානු යෝජනාවලට පිළිතුරු ලෙස ඉරානය පවසා සිටියේ යුද්ධය අවසන් කිරීමට නම් විශේෂයෙන් ලෙබනනයේ සටන් නැවැත්විය යුතු බවයි.
මීට අමතරව ඉරානය යුද හානි සඳහා වන්දි ගෙවීම, හොර්මුස් සමුද්ර සන්ධියේ (Strait of Hormuz) ස්වෛරීභාවය තහවුරු කිරීම, ඉරානයට එරෙහිව පනවා ඇති නාවික අවහිරතා සහ සම්බාධක ඉවත් කිරීම, ඉරාන තෙල් අලෙවියට පනවා ඇති තහනම ඉවත් කිරීම ඉල්ලීම් ද ඉදිරිපත් කර තිබේ.
ඉරානයේ මෙම ප්රතිචාරයට "Truth Social" මාධ්ය ජාලය ඔස්සේ පිළිතුරු දුන් ට්රම්ප්, එය තමා කිසිසේත් අනුමත නොකරන බව ප්රකාශ කළේය.ඉරාන හමුදා පරාජය වී ඇති නමුත් ඔවුන් තවමත් ක්රියාකාරී බව ඔහු වැඩිදුරටත් පැවසීය.
මේ අතර, ඊශ්රායල අගමැති බෙන්ජමින් නෙතන්යාහු අවධාරණය කළේ ඉරානයේ යුරේනියම් සාන්ද්රණය කිරීමේ මධ්යස්ථාන ඉවත් කරන තෙක් යුද්ධය නිම නොවන බවයි. අවශ්ය වුවහොත් බලය යොදා හෝ ඉරානයේ න්යෂ්ටික වැඩසටහන පාලනය කරන බව ඔහු අනතුරු ඇඟවීය.
පවතින අවිනිශ්චිතතාවය හේතුවෙන් බොරතෙල් බැරලයක මිල ඩොලර් 3කින් ඉහළ ගොස් ඇත. ලොව තෙල් සැපයුමෙන් පහෙන් එකක් ප්රවාහනය කෙරෙන හොර්මුස් සමුද්ර සන්ධිය අවහිර වීම මෙයට ප්රධාන හේතුවයි.
ඇමරිකාව තුළ ඉන්ධන මිල ඉහළ යාම හේතුවෙන් ට්රම්ප් පරිපාලනයට එල්ල වන දේශපාලන පීඩනය ද දැඩිය. මෙම අර්බුදය සම්බන්ධයෙන් සාකච්ඡා කිරීම සඳහා ට්රම්ප් ලබන බදාදා චීනයේ බීජිං නුවරට ගොස් ජනාධිපති ෂී ජින්පින් හමුවීමට නියමිතය.
දෙපාර්ශවය අතර සාම ගිවිසුම් පිළිබඳ කතාබහ පැවතියද, හොර්මුස් සමුද්ර සන්ධිය ආසන්නයේ ඩ්රෝන ප්රහාර සහ ගැටුම් තවදුරටත් වාර්තා වේ. එක්සත් අරාබි එමීර් රාජ්යය, කටාර් සහ කුවේට් යන රටවල් ද මෙම ඩ්රෝන ප්රහාර පිළිබඳව සිය කනස්සල්ල පළ කර ඇත.
