රංගට අවසන් ගෞරව දෙන්න පක්‍ෂයේ කිසිවෙක් නෑ.. ඔහු දිගු කාලීන සාමාජිකයෙක්..

 මහා භාණ්ඩාගාරයේ විදේශ සම්පත් දෙපාර්තමේන්තුවේ සහකාර අධ්‍යක්ෂවරයකු ලෙස සේවය කළ රංග රාජපක්ෂ මහතාගේ අවමංගල්‍ය උත්සවය 02 පස්වරුවේ වීරඹුව පොදු සුසාන භූමියේදී පවත්වනු ලැබීය.

පසුගිය අප්‍රේල් 30 වැනිදා සිය නිවසේ ගෙවත්ත තුළ මියගොස් සිටියදී හමුවූ රාජපක්ෂ මහතාගේ මරණය, අධික රුධිර වහනය හේතුවෙන් සිදු වූ සියදිවි හානිකර ගැනීමක් බව පශ්චාත් මරණ පරීක්ෂණ වාර්තාව මගින් තහවුරු කර ඇත.

එදින පස්වරුවේ පාසල් සේවය නිමවා පැමිණි ඔහුගේ බිරිඳ විසින් සිදුකළ සෝදිසියකදී, නිවසේ සිට මීටර 50ක් පමණ දුරින් වැටී සිටි ඒ මහතාව සොයාගෙන තිබුණි. 1990 ගිලන් රථ සේවය කැඳවා පරීක්ෂා කිරීමේදී ඔහු ඒ වන විටත් මියගොස් සිටි බව තහවුරු විය.

2013 වසරේ සිට මහබැංකුවට අනුයුක්තව කටයුතු කළ රාජපක්ෂ මහතා, මුදල් අමාත්‍යාංශයේ අමෙරිකානු ඩොලර් මිලියන 2.5ක වංචාවක් සම්බන්ධයෙන් එල්ල වූ චෝදනා මත ඔහුගේ සේවය තාවකාලිකව අත්හිටුවා තිබුණි.

පොලිස් විමර්ශනවලට අනුව එම මූල්‍ය අක්‍රමිකතාව සම්බන්ධයෙන් ඔහු දැඩි මානසික පීඩනයකින් පසු වී ඇති අතර මියගිය දින උදෑසන තමාට ජීවිතය එපාවී ඇති බව ඔහු සිය බිරිඳට පවසා තිබේ.

පොලිසිය පවසන පරිදි ඔහුට බාහිර පාර්ශ්වයකින් එල්ල වූ කිසිදු බලපෑමක් හෝ තර්ජනයක් පිළිබඳව මෙතෙක් අනාවරණය වී නොමැත.

අපරාධ පරීක්ෂණ දෙපාර්තමේන්තුව අප්‍රේල් 28 වැනිදා ඔහුගේ ජංගම දුරකතනය විමර්ශන සඳහා භාරයට ගෙන තිබුණි.

රංග රාජපක්ෂ මහතා ජනතා විමුක්ති පෙරමුණේ දීර්ඝ කාලීන ක්‍රියාකාරිකයෙකු ලෙස කටයුතු කළ පුද්ගලයෙකු වුවද, ඔහුගේ අවසන් කටයුතු සිදු කෙරුණු අවස්ථාවට එම පක්ෂය නියෝජනය කරමින් කිසිදු නිල මට්ටමේ නියෝජිතයෙකු සහභාගී වී නොසිටීම විශේෂත්වයකි.