Singapore Platts ඩීසල් ලීටරය රු. 300යි... ලංකාවේ 720ක් වෙන මිල සූත‍්‍රය අබිරහසක්..

 සිංගප්පූරු වෙළඳපොල මිල අනුව ඩීසල් ලීටරයක පිරිවැය රුපියල් 300ක් පමණ වන පසුබිමක, ලංකාව තුළ එය රුපියල් 720කට අලෙවි කරන්නේ කෙසේදැයි හිටපු අමාත්‍ය පාටලී චම්පික රණවක මහතා රජයෙන් ප්‍රශ්න කර සිටියි.

මාධ්‍ය හමුවකදී අදහස් දැක්වූ ඒ මහතා කියා සිටියේ, සිංගප්පූරු ප්ලට්ස් (Singapore Platts) දර්ශකයට අනුව ඩීසල් බැරලයක මිල රුපියල්වලින් ගණනය කළ විට ලීටරයක මිල රුපියල් 300ක් පමණ වන බවයි.

ඩීසල් මිල රුපියල් 720ක් පමණ වන බවට ජනාධිපතිවරයා සිදුකළ ප්‍රකාශය පිළිබඳව ස්තූතිවන්ත වන බව පැවසූ රණවක මහතා, රුපියල් 300ක මිල 720ක් දක්වා ඉහළ යන්නේ කුමන පදනමකින්ද යන්න පිළිබඳව ජනාධිපතිවරයා රටට පැහැදිලි කළ යුතු බව අවධාරණය කළේය.

පසුගිය පාලන සමයන්හිදී ඉන්ධන මිල තීරණය වන මිල සූත්‍රය ප්‍රසිද්ධියට පත් කළද, වත්මන් රජය එම කරුණු යටපත් කරමින් මහජනතාවට වැරදි ප්‍රකාශ නිකුත් කරන බවට ඔහු චෝදනා කළේය.

"අද මේ ආණ්ඩුවේ ඔක්කොම යට ගහලා මහජනයාට විකෘති ප්‍රකාශ කරනවා," යැයි ඔහු වැඩිදුරටත් පැවසීය.

බලශක්ති අර්බුදය පිළිබඳව වැඩිදුරටත් අදහස් දැක්වූ හිටපු අමාත්‍යවරයා, නිසි කාලයට ටෙන්ඩර් පටිපාටියක් අනුගමනය කරමින් ගල් අඟුරු ප්‍රසම්පාදනය නොකිරීමේ බරපතල තාක්ෂණික ප්‍රශ්න මතු වී ඇති බව පෙන්වා දුන්නේය.

මේ හේතුවෙන් ගල් අඟුරු නැව් දෙකක් ගොඩබා ගත නොහැකිව අතරමග නතර වී ඇති බවත්, පවතින වැසි සහිත කාලගුණයත් සමඟ එම කටයුතු තවත් අසීරු වී ඇති බවත් ඔහු අනාවරණය කළේය.

තම පාලන සමයේ ටෙන්ඩර් නොමැතිව ගල් අඟුරු ගෙනා බවට එල්ල වන චෝදනා ප්‍රතික්ෂේප කළ ඒ මහතා, තමාගේ නියෝග මත එවැනි ගනුදෙනු සිදුකළ අවස්ථා පෙන්වන ලෙස අභියෝග කළේය.

ඇතැම් පාර්ශවයන් බලශක්ති අර්බුදයට විසඳුම් සෙවීම වෙනුවට 2008 වසරේ සිදුවීම් ඇද ගනිමින් දේශපාලන මඩ ගැසීම්වල නිරත වන බවද ඔහු වැඩිදුරටත් සඳහන් කළේය