ලංකාවේ ලොකුම තොරණේ ලක්‍ෂ තුනහමාරක වයර් හොරෙන් කපයි...

 කළුතර නගරයේ නිර්මාණය කරන ලද මෙරට විශාලතම වෙසක් තොරණ සඳහා භාවිත කළ රුපියල් ලක්ෂ තුනහමාරක් පමණ වටිනා විදුලි රැහැන් තොගයක් වංචනික ලෙස ලබාගත් පුද්ගලයකු ප්‍රදේශවාසීන්ගේ මැදිහත්වීමෙන් නීතියේ රැහැනට හසුකර දී තිබේ.

පානදුර දකුණ මූලස්ථාන පොලිසිය මඟින් මෙලෙස අත්අඩංගුවට ගෙන ඇත්තේ මෝදර විල ප්‍රදේශයේ පදිංචිව සිටින 35 හැවිරිදි වියේ පසුවන අයෙකි.

පසුගිය වෙසක් සමයේ ප්‍රදර්ශනය කෙරුණු මෙම තොරණේ විදුලි ආලෝකකරණ කටයුතු සිදුකර තිබුණේ පානදුරේ පිහිටි ආයතනයක් මඟිනි.

තොරණ ප්‍රදර්ශනය අවසන් වීමෙන් පසු ගලවා ගන්නා ලද විදුලි රැහැන් සියල්ල එම ආයතන හිමිකරු විසින් පානදුර නගරයේ පිහිටි තමන්ගේ නිවසේ සුරක්ෂිතව තැන්පත් කර තිබී ඇත.

කෙසේ වෙතත්, දින හතරක් තිස්සේ මෙම ස්ථානයෙන් අඛණ්ඩව වයර් අතුරුදන් වන අයුරු නිවසේ සවිකර තිබූ ආරක්ෂිත කැමරා පද්ධතිය මඟින් අනාවරණය කර ගැනීමට හිමිකරුට හැකි විය.

ඒ අනුව පස්වන දිනයේදී සැකකරු කොටුකර ගැනීම සඳහා සෝදිසියෙන් සිටි නිවැසියන්, අවට පදිංචිකරුවන්ගේද සහාය ඇතිව ඔහුව එම ස්ථානයේදීම අල්ලා පොලිස් භාරයට පත් කිරීමට පියවර ගෙන තිබේ.

පොලිස් අත්අඩංගුවට පත් වූ මෙම සැකකරු පානදුර මහේස්ත්‍රාත් අධිකරණය වෙත ඉදිරිපත් කිරීමට නියමිතය.