ඇමරිකාව ඉරානයෙන් පාඩම් ඉගෙන ගනී.. මරාගෙන මැරෙන ඩ්‍රෝන යානා ලක්‍ෂ ගණනක් අඩු වියදමින් හදති...

 අඩු පිරිවැයකින් නිෂ්පාදනය කළ හැකි, එක්වරක් පමණක් ප්‍රහාර සඳහා යොදාගන්නා මරාගෙන මැරෙන ඩ්‍රෝන යානා විශාල ප්‍රමාණයක් මිලදී ගැනීමේ සැලසුම් වේගවත් කිරීමට ඇමෙරිකානු ආරක්ෂක මූලස්ථානය වන පෙන්ටගනය පියවර ගෙන තිබේ. 'ඩ්‍රෝන ආධිපත්‍යය' තහවුරු කිරීමේ මෙම වැඩපිළිවෙළ යටතේ 2027 වසර වන විට ඩ්‍රෝන යානා 300,000 සිට 340,000 දක්වා වූ දැවැන්ත සංඛ්‍යාවක් ආරක්ෂක බලඇණි වෙත මුදාහැරීම ඇමෙරිකාවේ ඉලක්කය වී ඇත. 

යුක්රේන සහ මැදපෙරදිග යුද ගැටුම්වලින් ලබාගත් අත්දැකීම් පාදක කරගනිමින් පෙන්ටගනය මෙම තීරණයට එළඹ තිබේ. එම යුද බිම්වලදී ඩොලර් මිලියන ගණනක් වටිනා නවීන පන්නයේ යුද ටැංකි, ගුවන් ආරක්ෂණ පද්ධති සහ අනෙකුත් ඉහළ මිලිටරි සම්පත් විනාශ කිරීම සඳහා ඉතා අඩු පිරිවැයක් සහිත සරල ඩ්‍රෝන යානා සාර්ථකව භාවිත කරන අයුරු නිරීක්ෂණය විය.

මෙම නව ව්‍යාපෘතිය යටතේ ඇමෙරිකානු ආරක්ෂක අමාත්‍යාංශය අපේක්ෂා කරන්නේ මුල් අවස්ථාවේදී උපරිමය ඩොලර් 5,000ක් වන අතර, පසුව මහා පරිමාණ නිෂ්පාදන හරහා එක් ඩ්‍රෝන යානයක මිල ඩොලර් 2,300ත් 5,000ත් වැනි අවම මට්ටමකට පත්කර ගැනීමටයි. මේ හරහා අධික පිරිවැයක් නොදරා, යුද බිමේදී ඕනෑම මොහොතක විනාශ වී යා හැකි පරිභෝජන භාණ්ඩ ලෙස මෙම ඩ්‍රෝන යානා දසදහස් ගණනින් එකවර සටන් පෙරමුණට යෙදවීමට මිලිටරි අංශවලට හැකියාව ලැබෙනු ඇත.

මෙතෙක් කල් ඇමෙරිකානු ආරක්ෂක අංශ මුහුණ දුන් ප්‍රධානතම ගැටලුව වූයේ සාම්ප්‍රදායික මහා පරිමාණ ආරක්ෂක කොන්ත්‍රාත්කරුවන් හරහා ආයුධ නිපදවීමේදී සිදුවන අධික ප්‍රමාදය සහ ඉහළ පිරිවැයයි.

එහෙත් පෙන්ටගනයේ මෙම නව උපායමාර්ගික වෙනස්කම යටතේ, නැගී එන ගෝලීය මිලිටරි තර්ජනවලට කඩිනමින් මුහුණ දීම සඳහා ක්ෂණික නිෂ්පාදන ධාරිතාව ඇති නවක තාක්ෂණික සමාගම්, සිවිල් තාක්ෂණික ආයතන සහ ඩ්‍රෝන ධාවන තරග ක්ෂේත්‍රයේ විශේෂඥයන් වෙත පවා ආරක්ෂක කොන්ත්‍රාත් විවෘත කිරීමට පියවර ගෙන තිබේ. කෙසේ වෙතත්, මෙම ඩ්‍රෝන යානාවල මෝටර් සඳහා අත්‍යවශ්‍ය වන දුර්ලභ පස් චුම්බක  සැපයුමෙන් 98%ක්ම චීනය සතු වීම, මෙම දැවැන්ත ව්‍යාපෘතිය ඉදිරියේදී මුහුණ දිය හැකි ප්‍රධානතම අභියෝගය වනු ඇතැයිද ආරක්ෂක විශ්ලේෂකයෝ පෙන්වා දෙති.