සාම ගිවිසුමක් අද නෑ..- ඉරානය

ඇමරිකා එක්සත් ජනපදය සහ ඉරානය අතර පවතින යුදමය තත්ත්වය නිමා කිරීමේ පළමු පියවර ලෙස සාම ගිවිසුමක් අත්සන් කිරීමට දෙපාර්ශවයම ඉතා සමීප වී ඇති බව වාර්තා වේ.

කෙසේ වෙතත්, මෙම ගිවිසුම අත්සන් කරන නිශ්චිත වේලාව සම්බන්ධයෙන් දෙරට අතර තවමත් පරස්පර අදහස් පවතී.

ඇමරිකානු ජනාධිපති ඩොනල්ඩ් ට්‍රම්ප් සිය 'Truth Social' ගිණුමේ සටහනක් තබමින් ප්‍රකාශ කර ඇත්තේ, මෙම ඓතිහාසික ගිවිසුම අද (ඉරිදා) දිනම අත්සන් කිරීමට නියමිත බවයි.

මෙම ගිවිසුම මගින් ඉරානයට කිසිසේත්ම න්‍යෂ්ටික අවියක් නිෂ්පාදනය කිරීමට හෝ මිලදී ගැනීමට ඉඩ නොලැබෙන බවත්, හොර්මුස් සමුද්‍ර සන්ධිය වහාම ලෝක වෙළඳාම සඳහා විවෘත වන බවත් ඔහු අවධාරණය කර ඇත.

එනමුත්, ඉරාන විදේශ අමාත්‍යාංශය මෙම කාලසටහන ප්‍රතික්ෂේප කර තිබේ. ඉරාන ප්‍රකාශකයෙකු සඳහන් කළේ අද දින ගිවිසුම අත්සන් කිරීමක් සිදු නොවන නමුත්, ඉදිරි දින කිහිපය තුළ එය සිදුවීමේ හැකියාව පවතින බවයි.

ඉරාන විදේශ අමාත්‍ය අබ්බාස් අරග්චි පවසන පරිදි, කරුණු 14 කින් සමන්විත මෙම ගිවිසුමේ පළමු පියවර වන්නේ ඉරාන වරායන් වෙත පනවා ඇති ඇමරිකානු අවහිරතා ඉවත් කිරීමයි.

මීට අමතරව, අත්හිටුවා ඇති ඉරාන වත්කම් නිදහස් කිරීම සහ ලෙබනනය ඇතුළු සියලු පෙරමුණු වල සතුරුකම් නැවැත්වීම ද මෙයට ඇතුළත් වේ.

මෙම සාම සාකච්ඡා සඳහා පාකිස්තානය ප්‍රධාන මැදිහත්කරුවෙකු ලෙස කටයුතු කර ඇති අතර, මෙය විද්‍යුත් ක්‍රමවේදයක් හරහා අත්සන් කිරීමට නියමිත බව පාකිස්තාන අග්‍රාමාත්‍යවරයා ඉඟි කර ඇත.

සාම ගිවිසුම පිළිබඳ බලාපොරොත්තු මධ්‍යයේ වුවද, ලෙබනනය තුළ තවමත් ඊශ්‍රායල ප්‍රහාර සහ හෙස්බොල්ලා සංවිධානයේ ප්‍රතිප්‍රහාර දරුණු ලෙස ක්‍රියාත්මක වන බව වාර්තා වේ.

ගිවිසුම අත්සන් කිරීමෙන් පසුව, න්‍යෂ්ටික වැඩපිළිවෙළ සහ සම්බාධක ඉවත් කිරීම පිළිබඳ තාක්ෂණික කරුණු සාකච්ඡා කිරීම සඳහා දින 60 ක කාලයක් ලබා දීමට නියමිතය