ඉරානයෙන් කෲස් මිසයිල, ඩ්‍රෝන ප්‍රහාර.. ඇමෙරිකානු යුද නැව් ඕමාන් බොක්කෙන් පසුබසී...

 ඕමාන් බොක්ක මුහුදු තීරයේ මෙහෙයුම්වල නිරතව සිටි ඇමෙරිකානු යුද නැව් කිහිපයක්, ඉරාන නාවික හමුදාව එල්ල කළ අනතුරු ඇඟවීමේ කෲස් මිසයිල සහ නවීන ඩ්‍රෝන ප්‍රහාර හමුවේ එම කලාපයෙන් පසුබැසීමට සිදුව ඇති බව ඉරාන හමුදාව නිවේදනය කරයි.

ඉරාන හමුදාව විසින් නිකුත් කරන ලද නිල ප්‍රකාශයක දැක්වෙන්නේ, "ඇමෙරිකානු ත්‍රස්තවාදී නාවික බලකාය" විසින් සිදු කරනු ලබන සමුද්‍රීය කඩාකප්පල්කාරී ක්‍රියා, වාණිජ සහ තෙල් නැව් පැහැරගැනීම් මැඩපැවැත්වීම සඳහා ඉරාන ඉස්ලාමීය ජනරජය දියත් කරන අඛණ්ඩ මෙහෙයුම්වල කොටසක් ලෙස මෙම පියවර ගත් බවයි.

එම ප්‍රකාශයට අනුව, ඉරාන නාවික හමුදාවට අයත් ‘කාදීර්’ මිසයිල සහ ‘ෂහීඩ් දානා’ නමැති නවීන ප්‍රහාරක ඩ්‍රෝන යානා යොදා ගනිමින් එල්ල කළ අනතුරු ඇඟවීමේ ප්‍රහාරවලින් පසු, ඇමෙරිකානු නාවික හමුදාවට අයත් ‘DDG-103’ සහ ‘DDG-8’ යන විනාශකාරී යුද නැව් ඕමාන් බොක්කෙන් ඉන්දියන් සාගරය දෙසට පසුබැස ඇත.

මීට අමතරව, ‘USS George H.W. Bush’ ගුවන් යානා ප්‍රවාහන නෞකා බලඝණය යටතේ ක්‍රියාත්මක වූ ඇමෙරිකානු-ඊශ්‍රායල යුද නැව් මෙන්ම ‘USS Tripoli’ නමැති ඇමෙරිකානු උභයජීවී ප්‍රහාරක හෙලිකොප්ටර් රැගෙන යන නෞකාවට ද ඕමාන් බොක්කෙන් පළායෑමට සිදු වූ බව ඉරානය තහවුරු කරයි.

ඉරාන සන්නද්ධ හමුදාවේ නාවික මෙහෙයුම් අණදෙන සහ පාලන මධ්‍යස්ථානය ඇමෙරිකානු සහ ඊශ්‍රායල පාර්ශව වෙත දැඩි අනතුරු ඇඟවීමක් කරමින් කියා සිටියේ, මුහුදු කොල්ලකෑම් සහ කඩාකප්පල්කාරී ක්‍රියා වහාම නතර කළ යුතු බවයි. ඇමෙරිකානු නැව් මේ වන විට අනතුරු ඇඟවීමේ ප්‍රහාර සඳහා යොදාගත් මිසයිල සීමාවෙන් ඔබ්බට ගොස් තිබුණද, ඉරානය සතුව ඊට වඩා දිගු දුරක් විදීමේ හැකියාව ඇති මිසයිල පවතින බවත්, අවශ්‍ය වුවහොත් ඒවා කිසිදු පැකිලීමකින් තොරව භාවිත කරන බවත් ඉරානය අවධාරණය කරයි.

පසුගිය පෙබරවාරි 28 වනදා ඇමෙරිකාව සහ ඊශ්‍රායලය විසින් ආරම්භ කරන ලද ආක්‍රමණශීලී ක්‍රියාවලට ප්‍රතිචාර වශයෙන් ඉරානය විසින් සාර්ථක ප්‍රතිප්‍රහාර රැල්ලක් දියත් කරන ලද අතර, කලාපයේ පිහිටි ඇමෙරිකානු සහ ඊශ්‍රායල උපායමාර්ගික මධ්‍යස්ථාන රැසකට ඉන් දැඩි හානි සිදු විය. එමෙන්ම ඉරානය විසින් සතුරු රටවල් සඳහා හෝර්මුස් සමුද්‍ර සන්ධිය ද වසා දැමීමට පියවර ගැනුණි.

මෙම දැඩි ප්‍රතිප්‍රහාර හමුවේ, ඇමෙරිකානු ජනාධිපති ඩොනල්ඩ් ට්‍රම්ප් විසින් පසුගිය අප්‍රේල් 8 වනදා ඒකපාර්ශ්වික සටන් විරාමයක් ප්‍රකාශයට පත් කරන ලදී. කෙසේ වෙතත්, එම සටන් විරාම ගිවිසුම් උල්ලංඝනය කරමින් අප්‍රේල් 13 වනදා ඇමෙරිකාව විසින් ඉරාන නැව් සහ වරායන් වෙත නීතිවිරෝධී නාවික අවහිරතාවක් පැනවීමට කටයුතු කිරීම නිසා, ඉරානය මේ වන විට හෝර්මුස් සමුද්‍ර සන්ධියේ ආරක්ෂාව සහ පාලනය වෙනදාට වඩා දැඩි කර ඇත.

තම ස්වෛරී මුහුදු සීමාවන් තුළ සිදුවන කිසිදු විදේශීය මිලිටරි මැදිහත්වීමක් හෝ කලාපීය වෙළඳාමට සිදුවන බාධාවන් ඉවසන්නේ නැති බව ඉරානය නැවත වරක් ප්‍රකාශ කර සිටී.