වෙසක් පෝයට ගුටි දන්සලක්.. දන්සල් මැරයෝ මෝටර් රියකට වටකර පහර දෙති..

 පාර අවහිර වන සේ සංවිධානය කර තිබූ දන්සලක් අසලින් තමන්ගේ නිල වාහනයෙන් ගමන් කිරීමට උත්සාහ කළ අවස්ථාවකදී, පිරිසක් විසින් තමන්ට කුණුහරුපයෙන් බැන වැදී දරුණු ලෙස පහර දුන් බව පවසමින් පුද්ගලයෙකු විසින් පොලිස් මූලස්ථානය වෙත පැමිණිල්ලක් ඉදිරිපත් කර තිබේ.

පැමිණිල්ලේ විස්තර අනුව බත්තරමුල්ල කොස්වත්ත හන්දියේ සිට රාජගිරිය අඹගහ හන්දිය දක්වා දිවෙන කලපලුවාව කොස්වත්ත මාර්ගයේ, අග්ගොන මාළු සහ එළවළු වෙළෙඳපොළ අසලදී මෙය සිදුව ඇත.

අදාළ ස්ථානයේ පිරිසක් විසින් පාර මුළුමනින්ම වසා දමමින්, වාහන නවත්වමින් දන්සලක් පවත්වමින් සිට ඇත. ඒ හේතුවෙන් ඉදිරියට යාමට නොහැකි වූ පැමිණිලිකරු තම රථයේ නළාව එක වරක් නාද කර තිබේ.

ඉන් උරණ වූ දන්සල් සංවිධායකයින් ඇතුළු පිරිස වාහනය වටකර අශිෂ්ට ලෙස බැන වදිමින් පහර දී ඇත. සැකකරුවන්ගේ මුහුණු පැහැදිලිව පෙනෙන සේ තම ජංගම දුරකථනයෙන් දර්ශන පටිගත කර ගැනීමට තමන්ට හැකි වූ බවද ඔහු පවසයි.

මෙම මැර ප්‍රහාරය හේතුවෙන් පැමිණිලිකරුගේ බිරිඳගේ වම් අතට තුවාල සිදුවී ඇති අතර, ඔවුන් ගමන් කළ මෝටර් රථයටද දැඩි ලෙස අලාභහානි සිදුව තිබේ.

සිද්ධිය සිදු වූ වහාම ඒ පිළිබඳව 119 හදිසි ඇමතුම් අංශයට මෙන්ම, වැලිකඩ සහ තලංගම පොලිස් ස්ථාන වෙතද දුරකථනයෙන් දැනුම් දීමට ඔහු පියවර ගෙන ඇත.

මහජනතාවට හිරිහැර වන පරිදි අත්තනෝමතික ලෙස හැසිරෙමින් නීතිය අතට ගත් මෙම සාහසිකයින් කඩිනමින් අත්අඩංගුවට ගෙන සාධාරණයක් ඉටු කරන ලෙස පැමිණිලිකරු පොලිසියෙන් වැඩිදුරටත් ඉල්ලා සිටියි.