රඛිත රාජපක්‍ෂ, චරිත් අබේසිංහ රිමාන්ඩ් කෙරේ..

 අල්ලස් හෝ දූෂණ චෝදනා විමර්ශන කොමිෂන් සභාව විසින් අත්අඩංගුවට ගන්නා ලද රඛිත රාජපක්ෂ, චරිත අබේසිංහ, වරුෂ චතුරංග යන පුද්ලයන් අධිකරණයට ඉදිරිපත් කිරීමෙන් පසු එළැඹෙන 03 වනදා දක්වා රක්‍ෂිත බන්ධනාගාරගත කර ඇත. 

අපරාධ පරීක්ෂණ දෙපාර්තමේන්තුවේ රැඳවුම් භාරයේ සිටි සංවිධානාත්මක අපරාධකරුවෙකු වන නඳුන් චින්තක වික්‍රමරත්න නොහොත් ‘හරක් කටා’ නමැත්තාගේ ජීවිතය ආරක්ෂා කරදීම ඇතුළු සහන කිහිපයක් සලසා දීම සඳහා රුපියල් කෝටි 12ක අත්තිකාරම් අල්ලස් මුදලක් ලබාගැනීමේ චෝදනාව අල්ලස් හෝ දූෂ චෝදනා විමර්ශන කොමිෂන් සභාව විසින් මෙම සැකකරුවන් තිදෙනා  වන දින අත්අඩංගුවට ගත්තේය.

අල්ලස් හෝ දූෂණ චෝදනා විමර්ශන කොමිෂන් සභාවේ මාධ්‍ය ඒකකය නිකුත් කළ  මාධ්‍ය නිවේදනයට අනුව සැකකරුවන් විසින් 2023 වර්ෂයේදී ඩුබායි රාජ්‍යයේදී, ‘හරක් කටා’ නැමැත්තාගේ බිරිඳ වන මධුෂිකා මධුවන්ති නැමැත්තියගෙන් මුලින්ම රුපියල් ලක්ෂ 5000ක (කෝටි 50ක) මුදලක් අල්ලස් වශයෙන් ඉල්ලා ඇත.

පසුව එම මුදල රුපියල් ලක්ෂ 2000ක් (කෝටි 20ක්) දක්වා අඩු කර ඇති අතර, එයින් අත්තිකාරමක් ලෙස මෙම රුපියල් ලක්ෂ 1200ක (කෝටි 12) මුදල අල්ලස් වශයෙන් ඉල්ලා ලබාගෙන තිබේ. 

අපරාධ පරීක්ෂණ දෙපාර්තමේන්තුවේ රැඳවුම් නියෝග මත සිටි ‘හරක් කටා’ගේ ජීවිතය ආරක්ෂා කර දීමට , ඔහුගේ රැඳවුම් නියෝග ඉවත් කර ගාල්ල බූස්ස අධි ආරක්ෂිත බන්ධනාගාරයෙන් බැහැර වෙනත් බන්ධනාගාරයකට යොමු කර දීමට සහ විමර්ශන කටයුතු මෙන්ම ඊට අදාළ කටයුතු වලින් ඔහුව නිදහස් කර දීමට අවශ්‍ය කටයුතු සැලසීම වෙනුවෙන් මෙම අල්ලස් මුදල ලබාගෙන ඇති බව විමර්ශන වලදී අනාවරණය වී ඇත.