රජයේ සේවකයන්ට සහල් දෙන්න හදන්නේ එන කන්නය ගබඩා හිස් කරගන්නයි..

 රජයේ වී ගබඩා මේ වන විට උපරිම ධාරිතාවයෙන් පිරී පවතින බැවින්, ඉදිරි කන්නයේ වී අස්වැන්න මිලදී ගැනීම සඳහා එම ගබඩා කඩිනමින් හිස් කළ යුතුව ඇතැයි වෙළඳ, වාණිජ, ආහාර සුරක්ෂිතතාව සහ සමුපකාර සංවර්ධන අමාත්‍ය වසන්ත සමරසිංහ මහතා පවසයි.

ඒ අනුව, ගබඩාවල පවතින වී තොග සහල් බවට පත් කර රජයේ සේවකයන්ට සහ ‘අස්වැසුම’ ප්‍රතිලාභීන්ට ලබාදීම කෙරෙහි රජයේ අවධානය යොමු වී ඇති බව ඒ මහතා සඳහන් කළේය.

මාධ්‍ය හමුවක් අමතමින් අමාත්‍යවරයා පෙන්වා දුන්නේ, පසුගිය වසරේ රජය විසින් මෙට්‍රික් ටොන් එක්ලක්ෂ හතළිස් දහසකට (140,000) ආසන්න වී ප්‍රමාණයක් මිලදී ගෙන ඇති බවයි. මේ වන විට මෙරට මාස පහක හයකට ප්‍රමාණවත් සහල් අතිරික්තයක් පවතින බව ද ඔහු පැවසීය.

"අපිට දැන් තියෙන ලොකුම ප්‍රශ්නය තමයි ඊළඟ කන්නයේ වී මිලදී ගන්න ගබඩාවල ඉඩ නැති එක. ඒ නිසා මේ තියෙන වී ටික සහල් කරලා වෙළඳපොළට මුදාහැරිය යුතුයි. ඒ සඳහා අපිට විවිධ යෝජනා ලැබිලා තියෙනවා. ‘අස්වැසුම’ ප්‍රතිලාභීන්ට සහල් පැකට්ටුවක් ලබාදීම සහ රජයේ සේවකයන්ට සහන පදනම මත සහල් ලබාදීම ඒ අතර ප්‍රධානයි" යනුවෙන් අමාත්‍යවරයා ප්‍රකාශ කළේය.

වී කිලෝවක් සඳහා රුපියල් 120ක සහතික මිලක් ලබාදීමට රජය සූදානම් බවත්, ඇතැම් පිරිස් පවසන පරිදි රුපියල් 150ක මිලක් ලබාදීම ප්‍රායෝගික නොවන බවත් ඔහු මෙහිදී අවධාරණය කළේය.

පෞද්ගලික මෝල් හිමියන් රුපියල් 90-100 වැනි අඩු මිල ගණන්වලට වී මිලදී ගනිමින් සිටින පසුබිමක, රජය මැදිහත් වී ගොවියාට සාධාරණ මිලක් ලබාදීමට නම් ගබඩා පහසුකම් කඩිනමින් සලසා ගත යුතු බව ද වසන්ත සමරසිංහ මහතා වැඩිදුරටත් කියා සිටියේය.