පකිස්තානයෙන් ඇෆ්ගනිස්තානයට දරුණු ගුවන් ප‍්‍රහාර.. විශාල පිරියක් මරුට..

 ඇෆ්ගනිස්ථාන දේශසීමා කලාපය ඉලක්ක කරගනිමින් පාකිස්ථාන හමුදාව විසින් එල්ල කරන ලද දරුණු ගුවන් ප්‍රහාර හේතුවෙන්, මාස කිහිපයක් තිස්සේ එම කලාපයේ පැවති සාමකාමී වාතාවරණය බිඳවැටී ඇතැයි වාර්තා වේ.

පාකිස්ථාන තොරතුරු අමාත්‍ය අටාවුල්ලා තාරර් ප්‍රකාශ කළේ, හඳුනාගත් ඉලක්ක හතරක් වෙත එල්ල කළ  ප්‍රහාර මඟින් සටන්කාමීන් 26 දෙනෙකු ජීවිතක්ෂයට පත්කර ඇති බවයි. 

 ඇෆ්ගනිස්ථානයේ තාලිබාන් රජය පවසන්නේ පාකිස්ථාන ගුවන් ප්‍රහාර හේතුවෙන් ප්‍රාන්ත තුනක සිවිල් වැසියන් 13 දෙනෙකු මියගොස් ඇති අතර, ඉන් බහුතරය කුඩා ළමුන් බවයි.

තම රට තුළ ත්‍රස්ත ප්‍රහාර දියත් කරන සටන්කාමීන්ට ඇෆ්ගනිස්ථානය විසින් රැකවරණය සපයන බවට පාකිස්ථානය දිගින් දිගටම චෝදනා කරන නමුත්, තාලිබාන් රජය එම චෝදනා තරයේ ප්‍රතික්ෂේප කරයි.

පසුගිය පෙබරවාරි මාසයේදී ද දෙරට අතර ඇති වූ සන්නද්ධ ගැටුම් හේතුවෙන් පුද්ගලයන් විශාල පිරිසක් මියගියහ. එමෙන්ම, මාර්තු මාසයේදී කාබුල් අගනුවර පිහිටි මත්ද්‍රව්‍ය පුනරුත්ථාපන මධ්‍යස්ථානයකට පාකිස්ථානය එල්ල කළ ප්‍රහාරයකින් ද සිය ගණනක් ජීවිතක්ෂයට පත්වූහ.

පාකිස්ථාන තොරතුරු අමාත්‍යවරයා වැඩිදුරටත් සඳහන් කළේ, මෙම සතියේ එල්ල කරන ලද ප්‍රහාරයන් මෑතකදී පාකිස්ථානය තුළ සිදුවූ ත්‍රස්ත ක්‍රියාවලට ප්‍රතිචාරයක් ලෙස ක්‍රියාත්මක වූවක් බවයි.

දේශසීමා අසල පිහිටි සටන්කාමීන්ගේ පුහුණු කඳවුරක් සහ අවි ගබඩාවක් ඇතුළු ස්ථාන ඉලක්ක කර මෙම ප්‍රහාර දියත් කර තිබේ. පෙෂාවර් නගරය ආසන්නයේදී ආරක්ෂක අංශ ඉලක්ක කරගනිමින් සිදුවූ ප්‍රහාරයකින් නිලධාරීන් හයදෙනෙකු මියයෑමේ සිදුවීමෙන් පසුදිනම පාකිස්ථානය මෙම ගුවන් ප්‍රහාර මාලාව දියත් කර ඇත.

"කලාපීය සාමය සහ ස්ථාවරත්වය වෙනුවෙන් පාකිස්ථානය සැමවිටම කැපවී සිටිනවා. නමුත් ඒ සමඟම අපගේ පුරවැසියන්ගේ ආරක්ෂාව තහවුරු කිරීම අපගේ ප්‍රමුඛතම වගකීමයි," යැයි අමාත්‍ය තාරර් අවධාරණය කළේය.

තාලිබාන් රජයේ ප්‍රකාශක සබිහුල්ලා මුජාහිඩ් ප්‍රකාශ කළේ, කුනාර් , ඛොස්ට් සහ පක්තිකා යන ඇෆ්ගන් ප්‍රාන්තවලට එල්ල වූ ප්‍රහාරවලින් ළමුන් 11 දෙනෙකු, එක් කාන්තාවක සහ එක් වයෝවෘද්ධ පුද්ගලයෙකු මියගොස් ඇති බවයි. මීට අමතරව තවත් කාන්තාවන් සහ ළමුන් 14 දෙනෙකු තුවාල ලබා ඇතැයි ද ඔහු පැවසීය.

වෙනත් රටවලට තර්ජනයක් එල්ල කිරීම සඳහා තමන්ගේ භූමිය කිසිසේත්ම භාවිත කිරීමට ඉඩ නොදෙන බව ඇෆ්ගනිස්ථානය නැවත නැවතත් ප්‍රකාශ කර තිබේ.

එක්සත් ජාතීන්ගේ සංවිධානයේ වාර්තාවලට අනුව, පසුගිය මාර්තු 16 වැනිදා කාබුල් නුවර 'ඔමිඩ් මත්ද්‍රව්‍ය පුනරුත්ථාපන රෝහලට' එල්ල වූ පාකිස්ථාන ගුවන් ප්‍රහාරයෙන් පුද්ගලයන් 269 දෙනෙකු මියගොස් ඇත. එය තාලිබාන් සංවිධානය, නේටෝ (NATO) සංවිධානය සහ ඇෆ්ගන් සමූහාණ්ඩුවේ ආරක්ෂක අංශ අතර පැවති වසර 20ක යුද්ධයෙන් පසුව, ඇෆ්ගනිස්ථාන ඉතිහාසයේ තනි ප්‍රහාරයකින් සිදු වූ දරුණුතම ජීවිත හානිය ලෙස සටහන් වේ.