Vitz කාර් දෙන්න ආ ආණ්ඩුව ලීසිං දාලා හාල් දෙනවා..

රුපියල් ලක්ෂ දොළහක මුදලකට Vitz වර්ගයේ මෝටර් රථ පහසු ගෙවීමේ ක්‍රමයට ලබාදෙන බව පවසා බලයට පත් වූ වත්මන් රජය, අද වන විට රාජ්‍ය සේවකයන්ට පහසු ගෙවීමේ ක්‍රමයට සහල් කිලෝ 20ක් ලබාදීමට කටයුතු කරමින් සිටින බව විපක්ෂ නායක සජිත් ප්‍රේමදාස මහතා පවසයි.

හිටපු ජනාධිපති රණසිංහ ප්‍රේමදාස මහතාගේ 102 වැනි ජන්ම දිනය නිමිත්තෙන් තිස්සමහාරාම යෝධකණ්ඩිය බෝධිමහා විහාරස්ථානයට ජල පිරිපහදු පද්ධතියක් පරිත්‍යාග කිරීමේ අවස්ථාවට එක්වෙමින් විපක්ෂ නායකවරයා මේ බව සඳහන් කළේය.

මැතිවරණ සමයේදී වී කිලෝවක් සඳහා රුපියල් 150ක සහ පසුව 120ක සහතික මිලක් ලබාදෙන බවට පොරොන්දු වුවද, අද වන විට ගොවීන්ට සිය අස්වැන්න රුපියල් 75ත් 90ත් අතර ඉතා අඩු මිලකට අලෙවි කිරීමට සිදුව ඇති බව ඔහු පෙන්වා දුන්නේය. "ඡන්දය ගන්නා තෙක් ගොවියා දෙවියා බවත්, ගොවියා රජ කරන බවත් පැවසූ අය, අද තමන්ගේ අයිතීන් ඉල්ලා පාරට බසින ගොවීන්ට ‘කසිප්පුකාරයන්’ සහ ‘කෘතිම ගොවියන්’ ලෙස අපහාස කරනවා" යැයි ද ප්‍රේමදාස මහතා චෝදනා කළේය.

රාජ්‍ය සේවකයන් බොහෝ දෙනෙකු සිය වැටුපෙන් වාරික වශයෙන් ගෙවීමේ පදනම මත සහන මිලට වාහන ලබාගැනීමේ බලාපොරොත්තුවෙන් රජයට සහය දැක්වූ බවත්, එහෙත් අද ඔවුන්ට සහල් කිලෝ 20ක් වාරික වශයෙන් ගෙවීමට සිදුවීම හාස්‍යයට කරුණක් බවත් ඔහු පැවසීය.

දේශපාලනඥයන් මැතිවරණ සමයේදී ජනතාවට බොරු පොරොන්දු ලබා නොදී ‘මුසාවාදා වේරමණී’ සිල් පදය රැකීමට වගබලා ගත යුතු බව ද විපක්ෂ නායකවරයා මෙහිදී අවධාරණය කළේය.

පවතින ආර්ථික දුෂ්කරතා මධ්‍යයේ වුවද ජනතාව මුළා නොකර සැබෑ සහන ලබාදීමට රජය කටයුතු කළ යුතු බවත්, ජනතාවට දුන් පොරොන්දු ඉටුකිරීමට වත්මන් පාලනය අසමත් වී ඇති බවත් සජිත් ප්‍රේමදාස මහතා වැඩිදුරටත් කියා සිටියේය.