පෝට්සිටියේ සැප නිවාස ව්‍යාපෘතියක් අරඹයි..

 

කොළඹ වරාය නගරයේ ප්‍රථම නේවාසික සංවර්ධන ව්‍යාපෘතියේ ඉදිකිරීම් කටයුතු නිල වශයෙන් ආරම්භ කරමින් තීරණාත්මක සන්ධිස්ථානයක් සනිටුහන් කර ඇත. 

මෙරට ප්‍රමුඛතම විශේෂ ආර්ථික කලාපය  නියාමන සූදානමක සිට සක්‍රීය පෞද්ගලික අංශයේ මෙහෙයුම් දක්වා පරිවර්තනය වීම මෙමගින් පෙන්නුම් කෙරේ.

ආයෝජනය සහ සංවර්ධනය ‘බේ වන් රෙසිඩන්සස් කොළඹ’ (Bay One Residences Colombo) ලෙස නම් කර ඇති මෙම ව්‍යාපෘතිය, ශ්‍රී ලංකාවේ ප්‍රමුඛතම ඉදිකිරීම් සමාගමක් වන ඉන්ටර්නැෂනල් කොන්ස්ට්‍රක්ෂන් කොන්සෝටියම් (ICC) ආයතනය විසින් පිහිටුවන ලද ‘ICC Port City (Private) Limited’ මගින් ක්‍රියාත්මක කරනු ලබයි. 

වර්ග මීටර් 13,945 ක වපසරියකින් යුත් සුවිශේෂී වෙරළබඩ භූමි ප්‍රමාණයක ඉදිවන මෙම ව්‍යාපෘතිය සඳහා ඇස්තමේන්තුගත කර ඇති මුළු ආයෝජනය අමෙරිකානු ඩොලර් මිලියන 112 කි.

ජාත්‍යන්තර ප්‍රමිතීන්ට අනුකූලව නිර්මාණය කර ඇති මෙහි සුඛෝපභෝගී මහල් නිවාස 231 ක් ඇතුළත් වන අතර, එමගින් දේශීය මෙන්ම ජාත්‍යන්තර ගැනුම්කරුවන් සඳහා ලෝක මට්ටමේ නාගරික ජීවන අත්දැකීමක් ලබා දීමට අපේක්ෂිතය.

මේ පිළිබඳව අදහස් දක්වමින් ඉන්ටර්නැෂනල් කොන්ස්ට්‍රක්ෂන් කොන්සෝටියම් (Pvt) Ltd හි කළමනාකාර අධ්‍යක්ෂ/ප්‍රධාන විධායක නිලධාරී නාමල් පීරිස් මහතා ප්‍රකාශ කළේ, වරාය නගරයේ පළමු අදියරේ යටිතල පහසුකම් අවසන් කිරීමෙන් පසු මෙම ව්‍යාපෘතිය හරහා පදිංචිකරුවන්ට ජීවත් වීමට, රැකියාවේ නිරත වීමට සහ විවේකය ගත කිරීමට හැකි ඒකාබද්ධ පරිසරයක් හිමිවන බවයි.

එසේම, CHEC Port City Colombo (Pvt) Ltd හි කළමනාකාර අධ්‍යක්ෂ සියොං හොංෆෙන්ග් (Xiong Hongfeng) මහතා සඳහන් කළේ, වසර ගණනාවක සැලසුම් සහ නියාමන කටයුතුවලින් පසු පෞද්ගලික අංශයේ විශ්වාසය ප්‍රායෝගිකව ක්‍රියාත්මක වීම මෙමගින් සනාථ වන බවයි.

මුහුදෙන් ගොඩකරන ලද හෙක්ටයාර 269 ක භූමි භාගයක පිහිටි කොළඹ වරාය නගරය, දකුණු ආසියාවේ ප්‍රධාන ආර්ථික ද්වාරය ලෙස ස්ථානගත කර ඇත. බදු සහන, 100% විදේශීය අයිතිය සහ විදේශ විනිමය ගනුදෙනු සඳහා වන පහසුකම් සහිතව ඩුබායි හෝ සිංගප්පූරුව වැනි සාර්ථක ආර්ථික ආකෘතීන් අනුගමනය කරමින් ශ්‍රී ලංකාව ගෝලීය ප්‍රාග්ධනය සහ දක්ෂතාවන් සඳහා වන තරඟකාරී ගමනාන්තයක් බවට පත් කිරීම මෙහි දිගුකාලීන අරමුණයි.