මාලිමාණ්ඩුව පසුගිය කාලය පුරාම බෞද්ධ ජනතාවගේ බුද්ධාලම්බන ප්‍රීතිය නැංවීමට විවිධ ක‍්‍රියාමර්ග ගත්තා..

 ජාතික ජන බලවේගය කිසිම අවස්ථාවක බුදු දහමට, මහා සංඝරත්නයට හෝ පන්සලකට අසාධාරණයක් සිදු කර නොමැති බවත්, ආගම ඇදහීම වැළැක්වීමට කටයුතු කර නොමැති බවත් එම පක්ෂයේ පාර්ලිමේන්තු මන්ත්‍රී දේවානන්ද සුරවීර මහතා අවධාරණය කරයි.  

පසුගිය කාලසීමාව පුරාම බෞද්ධ ජනතාව තුළ බුද්ධාලම්බන ප්‍රීතිය ගොඩනැංවීම වෙනුවෙන් ජාතික ජන බලවේගය විවිධ ක්‍රියාමාර්ග ගත් බවත්, තමන්ට අවශ්‍ය වන්නේ මෙම රට නැවත සොහොනක් හෝ ඇවිදින කනත්තක් කිරීමට නොව, ආගමික සහජීවනය සහිතව රට ගොඩනැගීමට බවත් හෙතෙම සඳහන් කළේය.

වර්තමානය වන විට ජාතික ජන බලවේගයේ නායක අනුර කුමාර දිසානායක සහෝදරයා කෙරෙහි මෙරට ජනතාව තුළ මෙන්ම ජාත්‍යන්තරය තුළ ද ඉතා පැහැදිලි ආදරයක් සහ දැවැන්ත ජනප්‍රසාදයක් ගොඩනැගී ඇති බව සුරවීර මහතා පෙන්වා දුන්නේය. 

ව්‍යාජ කරුණු පතුරුවමින් ආණ්ඩුවට එරෙහිව මතයක් ගොඩනැගීමට ඇතැමුන් උත්සාහ කළද, එය සාර්ථක නොවන බව ඔහු තවදුරටත් කියා සිටියේය.

 වර්තමාන විපක්ෂය සුන්බුන් විපක්ෂයක් ලෙස හඳුන්වා දුන් මන්ත්‍රීවරයා, ඔවුන් කුමන බාධක පැමිණවූවත්, ජනතාව නොමඟ යැවීමට කුමන ව්‍යාපාර දියත් කළත්, ජාතික ජන බලවේගය ජනතාව සමඟ බද්ධ වෙමින් සිය ගමන ඉදිරියටම යන බව සහතික කළේය. 

දැනට පවතින දේශපාලන තත්ත්වය ඉතා යහපත් මට්ටමක පවතින බව දේවානන්ද සුරවීර මන්ත්‍රීවරයා වැඩිදුරටත් සඳහන් කළේය.