සිනොපෙක් දැවැන්ත මිල වැඩි කිරීමක.. 95 පෙට‍්‍රල් 487යි.. සුපිරි ඩීසල් 572යි.. සිපෙට්කෝ මතට අලාබ පෝලිමක්...

 

සිනොපෙක් එනර්ජි ලංකා (Sinopec Energy Lanka) පුද්ගලික සමාගම සිය ඉන්ධන මිල සංශෝධනය කිරීමට තීරණය කර ඇත.

මෙම නව මිල සංශෝධනය 2026 මාර්තු 22 වන දින මධ්‍යම රාත්‍රී සිට බලපැවැත්වෙන පරිදි ක්‍රියාත්මක වන බව එම සමාගම නිවේදනය කරයි.

රජය විසින් අනුමත කරන ලද සිල්ලර මිල ගණන් යටතේ ඔක්ටේන් 92 පෙට්‍රල් සහ ලංකා ඔටෝ ඩීසල් මිල ගණන් තීරණය කර ඇති අතර, වාරික (Premium) ඉන්ධන වර්ග වන ඔක්ටේන් 95 සහ ලංකා සුපර් ඩීසල් මිල ගණන් පවතින ජාත්‍යන්තර වෙළඳපොළ මිල අනුව රජයේ අනුමැතියට යටත්ව සංශෝධනය කර තිබේ.

සංශෝධිත නව මිල ගණන් පහත පරිදි වේ:

මෙම නව මිල ගණන් නැවත දැනුම් දෙන තුරු බලාත්මක වන අතර, රජයේ නියාමන අවශ්‍යතා සහ අනුමැතිය මත ඉදිරියේදී මිල වෙනස් විය හැකි බව සිනොපෙක් සමාගම වැඩිදුරටත් සඳහන් කරයි.

සාමාන්‍ය පෙට්‍රල් සහ ඩීසල් සඳහා සමාගම් දෙකම එකම මිලක් නියම කර ඇති අතර, සුපිරි ඉන්ධන (Premium products) සඳහා සිනොපෙක් සමාගම සිපෙට්කෝ ආයතනයට වඩා වැඩි මිලක් නියම කර තිබීම විශේෂත්වයකි.

මෙම මිල සංශෝධනය දෙස බැලීමේදී, විශේෂයෙන්ම සුපිරි ඉන්ධන කාණ්ඩයේ පවතින විශාල මිල වෙනස හේතුවෙන් ලංකා ඛනිජ තෙල් නීතිගත සංස්ථාව (සිපෙට්කෝ) දැඩි මූල්‍ය පීඩනයකට ලක්වීමේ අවදානමක් පවතී.

සිනොපෙක් සමාගමට සාපේක්ෂව සිපෙට්කෝ ආයතනය පෙට්‍රල් 95 ඔක්ටේන් ලීටරයක් රුපියල් 32කින්ද , සුපිරි ඩීසල් ලීටරයක් රුපියල් 129ක විශාල මුදලකින්ද අඩුවෙන් අලෙවි කරයි.

සිනොපෙක් සමාගම ජාත්‍යන්තර වෙළඳපොළ මිල අනුව සිය මිල ගණන් රුපියල් 122කින් සහ 219කින් (සුපිරි ඉන්ධන සඳහා) ඉහළ නංවා ඇති අතර , සිපෙට්කෝ ආයතනය එම ඉන්ධන සඳහා ඉහළ නංවා ඇත්තේ රුපියල් 90ක් වැනි අඩු අගයකි.

මෙලෙස සිපෙට්කෝ මිල පාලනය කරමින් අඩු මට්ටමක පවත්වා ගැනීම නිසා පාරිභෝගිකයන් වැඩි වශයෙන් සංස්ථාව වෙත යොමු වන අතර, පවතින පිරිවැය සහ විකුණුම් මිල අතර පරතරය හේතුවෙන් සංස්ථාවේ මූල්‍ය අලාභය තවදුරටත් වර්ධනය වීමේ ඉඩකඩ පවතී.

මෙම මිල වෙනස්කම් හරහා පෞද්ගලික අංශය ලාභය සහ පිරිවැය කළමනාකරණය කරගන්නා පසුබිමක, රජයට අයත් සිපෙට්කෝ ආයතනයට අඩු මිලට ඉන්ධන ලබාදීමේ බර තනිව දැරීමට සිදුවීම මගින් ඉදිරියේදී දැඩි මෙහෙයුම් අර්බුදයකට මුහුණ දීමට සිදුවනු ඇතැයි ආර්ථික විශ්ලේෂකයෝ පවසති.