සංචිත ඉවරයි.. දැන් කියන මිලට තෙල් ගන්න වෙනවා..- වසන්ත

මෙරටට මෑතකදී ආනයනය කරන ලද මෙට්‍රික් ටොන් 55,000ක ඉන්ධන තොගය දින හතක් වැනි කෙටි කාලයක් තුළ පාරිභෝගිකයන් විසින් ලබාගෙන අවසන් කර ඇති බව වෙළෙඳ අමාත්‍ය වසන්ත සමරසිංහ මහතා පවසයි.

අමාත්‍යවරයා පෙන්වා දෙන්නේ මේ වන විට මෙරට ඉන්ධන ඉල්ලුම සියයට 300කින් පමණ ඉහළ ගොස් ඇති බවයි.

පවතින තත්ත්වය පිළිබඳව වැඩිදුරටත් අදහස් දැක්වූ අමාත්‍යවරයා සඳහන් කළේ, කලින් ගෙනා ඉන්ධන තොග අවසන් වී ඇති බැවින් දැනට මෙරටට ළඟා වී ඇති නව ඉන්ධන නැව් සඳහා ගෙවීම් කළ යුත්තේ වත්මන් ලෝක වෙළෙඳපොළේ පවතින ඉහළ මිල ගණන් යටතේ බවයි.

"නැව් ටික ඇවිල්ලා මුහුදේ තියෙනවා. බාන්න කලින් අහනවා කීයද ගෙවන්නේ කියලා. නැවට තෙල් පටවන විට තිබූ මිල නෙමෙයි, දැන් බාන විට වෙළෙඳපොළේ පවතින මිලයි ඔවුන් ඉල්ලන්නේ. මුහුදේදී මිල වැඩි වුණේ නැහැනේ කියලා අපිට ඒගොල්ලන්ට කියන්න බැහැ," යැයි ද ඔහු අවධාරණය කළේය.

ලෝක වෙළෙඳපොළේ තෙල් මිල රුපියල් 25කින් පමණ ඉහළ යන විට ශ්‍රී ලංකාව වැනි කුඩා රටවලට එහි දැඩි පීඩාව විඳීමට සිදු වන බව අමාත්‍යවරයා පවසයි.

ලෝකයේ පවතින යුදමය වාතාවරණයන් මෙවැනි මිල ඉහළ යෑමට සෘජුව බලපාන බවත්, ලෝක සාමය ඇති වීම තුළින් මෙවැනි ආර්ථික පීඩාවන්ගෙන් මිදිය හැකි බවත් ඔහු වැඩිදුරටත් ප්‍රකාශ කළේය.