හදිසි මිල සංශෝධනයක්.. සියළුම ඉන්ධන මිල ගණන් ඉහල දැමේ..

 දිවයින පුරා බලපැවැත්වෙන පරිදි සිපෙට්කෝ (Ceypetco) ඉන්ධන මිල ගණන් අද (2026 මාර්තු 09) මධ්‍යම රාත්‍රී 12.00 සිට ඉහළ දැමීමට ලංකා ඛනිජ තෙල් නීතිගත සංස්ථාව තීරණය කර ඇත.

මෙම නව මිල සංශෝධනයට අනුව පෙට්‍රල්, ඩීසල් සහ භූමිතෙල් යන සියලුම වර්ගවල මිල ගණන් ඉහළ ගොස් තිබේ.

ඒ අනුව සංශෝධිත නව මිල ගණන්...

ජාත්‍යන්තර මූල්‍ය අරමුදල සමඟ ඇති කරගත් එකඟතාවන්ට අනුව ශ්‍රී ලංකාව තුළ ක්‍රියාත්මක ඉන්ධන මිල සූත්‍රයට අනුකූලව, සාමාන්‍යයෙන් සෑම මසකම 30 වන දින මිල සංශෝධනය සිදු කිරීමට නියමිතව තිබුණ ද, නියමිත කාලයට පෙර හදිසි මිල සංශෝධනයක් ප්‍රකාශයට පත් කිරීමට පියවර ගෙන තිබේ.

ලෝක වෙළඳපොළේ පවතින බොරතෙල් මිල උච්චාවචනයන් පිරිවැය ආවරණය වන පරිදි පාරිභෝගිකයා වෙත සමීප කිරීම මෙම මිල සූත්‍රයේ මූලික පරමාර්ථය වුවද, මීළඟ සංශෝධනය සඳහා තවත් දින විස්සක පමණ කාලයක් ඉතිරිව තිබියදී මෙලෙස මිල වෙනස් කිරීම විශේෂත්වයකි.

මැදපෙරදිග කලාපයේ උද්ගතව ඇති යුදමය වාතාවරණය හේතුවෙන් ගෝලීය වෙළඳපොළේ ඉන්ධන මිල සීග්‍රයෙන් ඉහළ යාම මෙම හදිසි තීරණයට ප්‍රධානතම හේතුව වී ඇති බව විශ්ලේෂකයෝ පෙන්වා දෙති.

ඒ අනුව, ජාත්‍යන්තර දේශපාලනික අස්ථාවරත්වය මත පදනම් වූ සැපයුම් දාමයේ අවහිරතා සහ මෙහෙයුම් පිරිවැය ඉහළ යාම හමුවේ දේශීය වෙළඳපොළ මිල ගණන් ද මෙලෙස සංශෝධනය කිරීමට බලධාරීන් කටයුතු කර ඇත.  

ලංකා ඛනිජතෙල් නීතිගත සංස්ථාවේ ප්‍රධානින් මෑතකදී පැවැති මාධ්‍ය හමුවලදී පැහැදිලිවම ප්‍රකාශ කර සිටියේ අප්‍රේල් මස අවසන් වන තෙක් දැනට ලංකාවට ප්‍රමාණවත් තෙල් සහතික කර ඇති බවය.

පවතින ලෝක අර්බුදකාරී තත්ත්වය මත ලංකාවට බලපාන්නේ අප්‍රේල් මාසයෙන් පසුව බවද ඔවුන් කියා සිටියහ.