බලාගාර ජලාශ සිදී යයි.. ජල විදුලිය අවදානමේ..

 

පවතින අධික වියළි කාලගුණ තත්ත්වය හේතුවෙන් ප්‍රධාන ජලාශ රැසක ජල මට්ටම ශීඝ්‍රයෙන් පහළ බැස තිබේ.

මේ හේතුවෙන් විදුලි උත්පාදනයට මෙන්ම සංචාරක ආකර්ෂණය දිනාගත් දිය ඇලිවල සුන්දරත්වයට ද දැඩි බලපෑම් එල්ල වී ඇත.

ඉහළ කොත්මලේ, කාසල්රි සහ මවුස්සාකැලේ යන ජලාශවල ජල මට්ටම ශීඝ්‍රයෙන් පහළ බැස ඇති බව එම ජලාශ භාර ඉංජිනේරුවරු පවසති.

මාර්තු 26 දින සවස 6:00 වන විට මවුස්සාකැලේ ජලාශය පිටාර මට්ටමේ සිට අඩි 40 අඟල් 9 කින් ද, කාසල්රි ජලාශය අඩි 39 අඟල් 4 කින් ද පහළ බැස ඇත.

ජල මට්ටම පහළ වැටීම නිසා ඉහළ කොත්මලේ ජලාශයේ විදුලි උත්පාදනයට බාධා පැමිණ ඇත. එමෙන්ම විමලසුරේන්ද්‍ර, කැනියොන්, ලක්ෂපාන, නව ලක්ෂපාන සහ පොල්පිටිය යන බලාගාර සඳහා ජලය සපයන කාසල්රි සහ මවුස්සාකැලේ ජලාශවල ජල මට්ටම තවදුරටත් අඩු වුවහොත් විදුලි උත්පාදනයට බාධා විය හැකි බව ඉංජිනේරුවරු අනතුරු අඟවති.

ජල ධාරිතාව අඩුවීම නිසා සංචාරක ආකර්ෂණය දිනාගත් ඩෙවෝන් සහ සෙන් ක්ලෙයාර් දිය ඇලිවල සුන්දරත්වය ද මේ වන විට ගිලිහී ගොස් ඇත.

මවුස්සාකැලේ සහ කාසල්රි ජලාශවල ජලය සිඳී යාමත් සමඟ ජලාශ පතුලේ පිහිටි පැරණි නටඹුන් ද යළි මතුවෙමින් පවතී.

පවතින අධික උණුසුම් කාලගුණය හේතුවෙන් නුවරඑළිය දිස්ත්‍රික්කයේ ජනතාව ද දැඩි පීඩාවට පත්ව සිටිති.