ඇමරිකා හමුදා ඉරානය වටලයි.. අවසන් මෙහෙයුම සූදානම්...

ඉරානය සමඟ පවතින යුද්ධය තීරණාත්මක අවසානයකට රැගෙන ඒම සඳහා දැවැන්ත "අවසන් ප්‍රහාරයක්" (Final Blow) එල්ල කිරීමට අදාළ හමුදාමය සැලසුම් ඇමරිකානු ආරක්ෂක මූලස්ථානය වන පෙන්ටගනය විසින් සකස් කරමින් පවතින බව වාර්තා වේ. මෙම මෙහෙයුම් සඳහා ගොඩබිම් හමුදා සහ දැවැන්ත ගුවන් ප්‍රහාරක බලකායන් යොදාගැනීමට අවධානය යොමුව ඇති බව ඇමරිකානු නිලධාරීන් උපුටා දක්වමින් විදෙස් මාධ්‍ය වාර්තා කරයි.

ඉරාන යුද්ධය අවසන් කිරීම සඳහා ජනාධිපති ට්‍රම්ප් වෙත ඉදිරිපත් කර ඇති ප්‍රධාන හමුදාමය විකල්ප හතරක් පිළිබඳව වොෂින්ටන් හෙළි කර තිබේ.

1. ඛාර්ග් දූපත අත්පත් කර ගැනීම: ඉරානයේ ප්‍රධානතම තෙල් අපනයන මධ්‍යස්ථානය වන ඛාර්ග් දූපත ආක්‍රමණය කිරීම හෝ වටලෑම.

2. අබු මූසා දූපත අත්පත් කර ගැනීම: හෝර්මුස් සමුද්‍ර සන්ධිය අසල පිහිටි උපායමාර්ගිකව වැදගත් අබු මූසා සහ තවත් කුඩා දූපත් දෙකක් සිය පාලනයට ගැනීම.

3. තෙල් ප්‍රවාහන නෞකා වැටලීම: හෝර්මුස් සමුද්‍ර සන්ධියේ නැගෙනහිර දෙසින් ඉරාන තෙල් අපනයනය කරන නෞකා නැවැත්වීම හෝ අත්අඩංගුවට ගැනීම.

4. න්‍යෂ්ටික මධ්‍යස්ථාන ඉලක්ක කිරීම: ඉරානය සතු යුරේනියම් තොග අත්පත් කර ගැනීම සඳහා එරට අභ්‍යන්තරයට ගොඩබිම් ප්‍රහාර එල්ල කිරීම හෝ එම මධ්‍යස්ථාන විනාශ කිරීමට ගුවන් ප්‍රහාර එල්ල කිරීම.

ධවල මන්දිර මාධ්‍ය ලේකම් කැරොලයින් ලෙවිට් ප්‍රකාශ කළේ, ඉරානය සමඟ එකඟතාවයකට පැමිණීමට නොහැකි වුවහොත් මින් පෙර කිසිදා සිදු නොවූ ආකාරයේ ප්‍රබල ප්‍රහාරයක් එල්ල කිරීමට ජනාධිපතිවරයා සූදානම් බවයි. "ජනාධිපතිවරයා හිස් තර්ජන නිකුත් කරන්නෙකු නොවේ, ඔහු අපායක් මුදා හැරීමට (unleash hell) සූදානම්" යැයි ඇය වැඩිදුරටත් සඳහන් කළාය.

මේ අතර, ඉරාන පාර්ලිමේන්තු කථානායක මොහොමඩ් බගර් ගලිබාෆ් ප්‍රකාශ කර ඇත්තේ තම දූපත් ආක්‍රමණය කිරීමට දරන ඕනෑම උත්සාහයකට එරෙහිව කලාපීය යටිතල පහසුකම් ඉලක්ක කර ගනිමින් දැවැන්ත ප්‍රතිප්‍රහාර එල්ල කරන බවයි.

මෙම උණුසුම් තත්ත්වය හමුවේ අතිරේක මැරීන් බළකායන් සහ 82 වන ගුවන් හමුදා බලඇණියේ භට පිරිස් දහස් ගණනක් ඉදිරි දින කිහිපය තුළ මැද පෙරදිග වෙත ළඟා වීමට නියමිතව ඇත.

දැනට පවතින රාජ්‍ය තාන්ත්‍රික සාකච්ඡා අසාර්ථක වුවහොත් සහ හෝර්මුස් සමුද්‍ර සන්ධිය දිගින් දිගටම වසා තැබුවහොත් මෙම දැවැන්ත හමුදා මෙහෙයුම ක්‍රියාත්මක වීමේ ඉඩකඩ වැඩි බව ආරක්ෂක අංශ පෙන්වා දෙයි.