මැදපෙරදිගින් තෙල් ලීටරයක් ගෙනයන්න දෙන්නෑ..- ඉරාන කරාමය තද කරයි..

 

එක්සත් ජනපදය සහ ඉස්රායලය එල්ල කරන ප්‍රහාර නතර නොකරන්නේ නම්, මැදපෙරදිග කලාපයෙන් "තෙල් ලීටරයක් හෝ" නැව්ගත කිරීමට ඉඩ නොදෙන බවට ඉරාන විප්ලවීය ආරක්ෂක බලකාය (IRGC) පසුගිය අඟහරුවාදා දැඩි අනතුරු ඇඟවීමක් කළේය.

මෙම ප්‍රකාශයත් සමඟ ලෝක තෙල් වෙළඳපොළේ දැඩි නොසන්සුන්තාවයක් හටගෙන ඇති අතර, ඉරානය හෝර්මූස් සමුද්‍ර සන්ධිය අවහිර කළහොත් ඊට වඩා "විසි ගුණයක ප්‍රබල ප්‍රහාරයකින්" ප්‍රතිචාර දක්වන බවට අමෙරිකානු ජනාධිපති ඩොනල්ඩ් ට්‍රම්ප් තර්ජනය කර ඇත.

ලොව වැදගත්ම තෙල් අපනයන මාර්ගය වන හෝර්මූස් සමුද්‍ර සන්ධිය, පවතින යුදමය වාතාවරණය හේතුවෙන් දැනටමත් සතියකට වැඩි කාලයක් තිස්සේ නැව් ගමනාගමනය සඳහා අඩාල වී පවතී. මෙහි ප්‍රතිඵලයක් ලෙස නිෂ්පාදකයින්ට සිය තෙල් පොම්ප කිරීම නතර කිරීමට සිදුව ඇත්තේ ගබඩා පහසුකම් පිරී යාම හේතුවෙනි. සෞදි අරාබියේ ඇරම්කෝ සමාගම පෙන්වා දෙන්නේ මෙම නාවික අවහිරතාවය දිගින් දිගටම පැවතුණහොත් ගෝලීය තෙල් වෙළඳපොළට "විනාශකාරී ප්‍රතිවිපාක" අත්විඳීමට සිදුවනු ඇති බවයි.

පසුගිය පෙබරවාරි මස අගභාගයේදී අමෙරිකාව සහ ඉස්රායලය ඉරානයට ගුවන් හා මිසයිල ප්‍රහාර එල්ල කිරීම ආරම්භ කළ දා සිට මේ දක්වා ඉරාන වැසියන් 1,332ක් මියගොස් දහස් ගණනක් තුවාල ලබා ඇති බව ඉරාන එක්සත් ජාතීන්ගේ තානාපතිවරයා පවසයි.

ඉරානයේ පවතින පූජක පාලනය පෙරලා දැමීම තම යුද අරමුණ බව ඉස්රායල් අගමැති බෙන්ජමින් නෙතන්යාහු ප්‍රකාශ කර ඇත.

ඉරානයේ මිසයිල සහ න්යෂ්ටික හැකියාවන් විනාශ කිරීම ප්‍රධාන අරමුණ වුවද, යුද්ධය අවසන් විය හැක්කේ වොෂින්ටනයට අවනත රජයක් ඉරානයේ පිහිටුවීමෙන් පමණක් බව ජනාධිපති ට්‍රම්ප් අවධාරණය කරයි.

පසුගියදා ඝාතනයට ලක්වූ අයතුල්ලා අලි කමේනිගෙන් පසුව ඔහුගේ පුත් මොජ්ටාබා කමේනි පත්වීමත් සමඟ යුද්ධය ඉක්මනින් අවසන් වනු ඇතැයි පැවති බලාපොරොත්තු බොඳ වී ගොස් තිබේ.

යුද්ධය පිළිබඳ පුවත් සමඟ ලෝක කොටස් වෙළඳපොළවල් පහත වැටුණු අතර තෙල් මිල ඉහළ ගියේය. කෙසේ වෙතත්, රුසියානු බලශක්ති සම්බාධක ලිහිල් කිරීමේ හැකියාව සහ අමෙරිකානු උපායමාර්ගික සංචිතවලින් තෙල් මුදා හැරීම පිළිබඳ වාර්තා හේතුවෙන් අඟහරුවාදා වන විට බ්‍රෙන්ට් බොරතෙල් මිල 10% කින් පමණ පහත වැටී තිබුණි.

ඉරාන විදේශ අමාත්‍ය අබ්බාස් අරක්චි පවසන පරිදි, මේ වන විට අමෙරිකාව සමඟ සාකච්ඡා කිරීමේ පදනමක් නොමැති අතර, යුද්ධය අවසන් වන ආකාරය තීරණය කරන්නේ තමන් බව ඉරාන ආරක්ෂක අංශ පවසයි.