ඇමරිකාවේ අවසන් මිසයිල තොග අවසන් සීමාවේ.. ලොව වටා කදවුරුවලින් කැදවයි..

ඉරානය සමඟ පවතින දැඩි යුධමය වාතාවරණය හමුවේ ඇමරිකානු උසස් මිසයිල තොග වේගයෙන් අවසන් වෙමින් පවතින බවත්, එම තත්ත්වය කළමනාකරණය කරගැනීම සඳහා ලොව පුරා විසිරී ඇති ඇමරිකානු මිසයිල තොග මධ්‍යම පෙරදිග වෙත කඩිනමින් රැගෙන ඒමට පියවර ගනිමින් සිටින බවත් බ්ලුම්බර්ග් පුවත් සේවය වාර්තා කරයි.

ඉරානයට එරෙහි ගුවන් මෙහෙයුම්වල දැඩි තීව්‍රතාව හේතුවෙන් ඇමරිකානු යුධ අවි ගබඩාවල තේජස පවත්වා ගැනීම පිළිබඳ ගැටලු මතුව ඇති අතර, මෙය ඉදිරි මෙහෙයුම්වල තිරසාරභාවයට මෙන්ම අනෙකුත් උපායමාර්ගික කලාපවල ආරක්ෂාවට ද බලපෑම් එල්ල කළ හැකි බව විචාරකයෝ පවසති.

යුද්ධයේ පළමු දින හය තුළදී පමණක් ඇමරිකාව විසින් ඉරානය වෙත ‘JASSM’ වර්ගයේ මිසයිල 786ක් එල්ල කර ඇත.

මෙවැනි අධි-තීව්‍ර මෙහෙයුම් දිගුකාලීනව පවත්වාගෙන යාමේ හැකියාව පිළිබඳව මේ වන විට බරපතල සැකයක් මතු වී තිබේ.

දැනටමත් ඇමරිකානු පැසිෆික් විධානය සතු මිසයිල තොග මධ්‍යම පෙරදිග වෙත හරවා යැවීමට නියෝග නිකුත් කර ඇත්තේ පවතින හිඟය පියවා ගැනීමටයි.

මීට අමතරව ඇමරිකානු මහාද්වීපයේ සහ අනෙකුත් විදේශීය කඳවුරුවල ඇති මිසයිල ද හදිසියේම ‘සෙන්ට්කොම්’ කඳවුරු වෙත යොමු කෙරේ.

භාවිතා කරන සෑම JASSM-ER මිසයිලයක්ම ඇමරිකානු ඩොලර් මිලියන 1.5ක් පමණ වටිනාකමකින් යුක්ත වේ. සැතපුම් 600කට වඩා වැඩි දුරක් විහිදෙන පරාසයකින් යුත් මෙම මිසයිල, සතුරු ගුවන් ආරක්ෂක පද්ධති මඟහැර ප්‍රහාර එල්ල කළ හැකි ප්‍රධානතම අවියක් ලෙස සැලකේ. කෙසේ වෙතත්, මෙම මිසයිල විශාල වශයෙන් වැය වීම ඇමරිකානු ආරක්ෂක පිරිවැය කෙරෙහි ද දැඩි බලපෑමක් එල්ල කර ඇත.

ඇමරිකානු ජනාධිපති ඩොනල්ඩ් ට්‍රම්ප් ප්‍රකාශ කර ඇත්තේ, හෝර්මුස් සමුද්‍ර සන්ධිය විවෘත කිරීමට හෝ සාමදාන වීමට ඉරානයට ඇත්තේ තවත් පැය 48ක කාලයක් පමණක් බවයි. මෙම කාලය තුළ එකඟතාවයකට නොපැමිණියහොත් "නිරයේ ගින්දර ඔවුන් මත ඇද හැලෙනු ඇති" බවට ඔහු අනතුරු අඟවා තිබේ.

වර්තමාන යුද්ධය හේතුවෙන් ගෝලීය බලශක්ති අර්බුදයක් නිර්මාණය වී ඇති අතර, ඉරානය විසින් ලොව තෙල් ප්‍රවාහනයෙන් පහෙන් එකක් සිදුවන හෝර්මුස් සමුද්‍ර සන්ධිය වසා දැමීම හේතුවෙන් ලෝක ආර්ථිකයට බරපතල හානි සිදුවෙමින් පවතී.