තමන් ඉතා අසීරු ආර්ථික ජීවිතයක් ගත කරන බවට ප්රසිද්ධියේ ප්රකාශ කළ කෘෂිකර්ම, පශු සම්පත්, ඉඩම් සහ වාරිමාර්ග අමාත්ය කේ.ඩී. ලාල්කාන්ත මහතාගේ 2025 වසරට අදාළ වත්කම් බැරකම් ප්රකාශය යැයි කියනු ලබන ලේඛනයක් මේ වන විට සමාජ මාධ්ය ජාලාවල දැඩි කතාබහට ලක්වෙමින් පවතී.
ප්රවීණ මාධ්යවේදී උවිඳු කුරුකුලසූරිය මහතා විසින් සිය සමාජ මාධ්ය ගිණුම හරහා ප්රසිද්ධ කර ඇති මෙම ලේඛනයට අනුව, මින් පෙර ඇමතිවරයා විසින් සිදුකළ ප්රකාශ සහ ඔහුගේ වත්කම් අතර පරස්පරතාවයක් පවතින බවට චෝදනා එල්ල වේ.
කුරගමගේ දොන් ලාල් කාන්ත යන නමින් පෙනී සිටින මෙම ප්රකාශය 2025 දෙසැම්බර් 26 වන දින සහතික කර ඇති අතර, මහජන ආරක්ෂක නියෝජ්ය අමාත්ය නීතිඥ සුනිල් වටගල මහතා ඒ සඳහා අත්සන් තබා ඇත. එම ලේඛනයට අනුව අමාත්යවරයා සතු දේපළ කිහිපයක් මෙසේය.
- රුපියල් ලක්ෂ 670ක පමණ වටිනාකමකින් යුත් ගොඩනැඟිලි සහ නිශ්චල දේපළ.
- රුපියල් ලක්ෂ 46ක් පමණ වටිනා රන් පවුම් සහ ආභරණ.
- මිතුරෙකු ලබාදුන් මුදලින් මිලදී ගත් බව කියන රුපියල් ලක්ෂ 45ක් වටිනා මෝටර් රථයක්.
- කොටස් වෙළඳපොළේ ලියාපදිංචි සමාගම් 10ක සිදුකර ඇති ආයෝජන.
- බැංකු ගිණුම්වල ඇති රුපියල් ලක්ෂ 9ක මුදලක්.
උවිඳු කුරුකුලසූරිය මහතා පෙන්වා දෙන්නේ පසුගිය කාලසීමාවේ දැඩි ආන්දෝලනයට තුඩු දුන් කඩුවෙල, වැලිවිට ප්රදේශයේ පිහිටි අමාත්යවරයාගේ සුපිරි තෙමහල් නිවස මෙම වත්කම් ප්රකාශයට ඇතුළත් කර නොමැති බවයි.
තමන්ට පෙන්වීමට තරම් වත්කමක් නොමැති බවට අමාත්යවරයා මීට පෙර මාධ්ය හමුවේ පවසා තිබුණද, මෙම ලේඛනය මඟින් හෙළිවන කරුණු ඊට පටහැනි බව ඔහු පවසයි.
"බිරිඳගේ වැටුපෙන් ජීවත් වන, දුවගේ ටියුෂන් ගාස්තු ගෙවා ගැනීමට නොහැකිව පක්ෂ සහෝදරයන් ලබාදෙන සහල් සහ පොල්වලින් ජීවිතය ගැටගසා ගන්නා" බව පවසන දේශපාලනඥයෙකු සතුව මෙවැනි වත්කම් පැවතීම පිළිබඳව විවේචන එල්ල වෙමින් පවතී.
මෙම හෙළිදරව්ව සම්බන්ධයෙන් අල්ලස් හෝ දූෂණ විමර්ශන කොමිෂන් සභාවේ අවධානය යොමු විය යුතු බවද අදාළ සටහන මඟින් අවධාරණය කර ඇත.
