කිසිදු අත්හදා නොබැලූ අවියකින් ඇමරිකාව ඉරාන පාසලකට සහ ක්‍රීඩා ශාලාවකට පහර දේ..

 

පසුගියදා ඉරානයේ ලාමර්ඩ් (Lamerd) නගරයේ පාසලකට සහ ක්‍රීඩා ශාලාවකට එල්ල වූ ප්‍රහාරය සඳහා අමෙරිකානු හමුදාව මෙතෙක් යුද බිමේ අත්හදා නොබැලූ නවතම බැලස්ටික් මිසයිලයක් භාවිතා කර ඇති බව 'නිව්යෝර්ක් ටයිම්ස්' පුවත්පත වාර්තා කරයි. 

ආයුධ විශේෂඥයන් සහ අදාළ දර්ශන විශ්ලේෂණය කරමින් එම පුවත්පත සඳහන් කරන්නේ පෙබරවාරි 28 වන දින ඇමරිකාව සහ ඊශ්‍රායලය එක්ව ඉරානයට එල්ල කළ පළමු ප්‍රහාරක රැල්ලේදී මෙම ප්‍රහාරය සිදුව ඇති බවයි.

ලාමර්ඩ් නගරයට එල්ල වූ මෙම ප්‍රහාරයෙන් අවම වශයෙන් පුද්ගලයින් 21 දෙනෙකු මියගොස් ඇති බව ඉරාන නිලධාරීන් තහවුරු කරයි. මීට සමගාමීව එදිනම මිනාබ් නගරයේ බාලිකා ප්‍රාථමික විදුහලකට එල්ල වූ මිසයිල ප්‍රහාරයකින් කුඩා දරුවන් ඇතුළු 175 දෙනෙකු ජීවිතක්ෂයට පත් විය.

පෙන්ටගනය විසින් පසුගිය වසරේදී පමණක් මූලාකෘති පරීක්ෂණ අවසන් කළ Precision Strike Missile (PrSM) නම් මිසයිලය මෙම ප්‍රහාරය සඳහා යොදාගෙන ඇති බව නිව්යෝර්ක් ටයිම්ස් පුවත්පත පෙන්වා දෙයි. ඉලක්කයට ඉහළින් පිපිරී කුඩා 'ටංස්ටන්' උණ්ඩ විසිරුවා හැරීම මෙම මිසයිලයේ ස්වභාවයයි.

ප්‍රහාරයට ලක්වූ පාසල සහ ක්‍රීඩා ශාලාව ඉරාන විප්ලවීය ආරක්ෂක බලකායේ (IRGC) මධ්‍යස්ථානයකට යාබදව පිහිටා තිබීම මෙම ප්‍රහාරයට හේතුව වන්නට ඇතැයි සැලකේ. කෙසේ වෙතත්, චන්ද්‍රිකා ඡායාරූප සහ ගූගල් සිතියම් දත්ත පරීක්ෂා කිරීමේදී පෙනී යන්නේ මෙම ගොඩනැගිලි වසර 15ක සිටම හමුදා කඳවුරෙන් වෙන්ව පැවති සිවිල් මධ්‍යස්ථාන ලෙස ලියාපදිංචි වී ඇති බවයි.

මෙම ප්‍රහාරය සිතාමතා කළ එකක්ද, නැතහොත් නව මිසයිලයේ පවතින දෝෂයක් හෝ වැරදි බුද්ධි තොරතුරු මත පදනම් වූවක්ද යන්න මෙතෙක් තහවුරු වී නොමැත.

ඉරානයට එල්ල වූ ඇමරිකානු සහ ඊශ්‍රායල ප්‍රහාරවලින් මේ වන විට සිවිල් වැසියන් 1,000කට අධික පිරිසක් මියගොස් ඇති බව නිල දත්ත වාර්තා කරයි. මිනාබ් පාසල් ප්‍රහාරයේ වගකීම භාරගැනීම ජනාධිපති ඩොනල්ඩ් ට්‍රම්ප් ප්‍රතික්ෂේප කර ඇතත්, පෙන්ටගනය මේ සම්බන්ධයෙන් අභ්‍යන්තර පරීක්ෂණයක් ආරම්භ කර තිබේ.