යලික් ඉන්ධන මිල සංශෝධනයක්.. රජයත් ටිකක් බර දරනවාලු..

ලෝක වෙළඳපොළේ පවතින මිල විචලනයන් සැලකිල්ලට ගනිමින්, ලබන මස මුලදී මෙරට ඉන්ධන මිල ගණන් යළි සංශෝධනය කිරීමට රජයේ අවධානය යොමුව තිබේ.

මේ සම්බන්ධයෙන් වන මූලික සාකච්ඡා මුදල් අමාත්‍යාංශයේ නිලධාරීන් විසින් මේ දිනවල පවත්වනු ලබන බව වාර්තා වෙයි.

කළුතර පැවති රැස්වීමකදී අදහස් දක්වමින් අමාත්‍ය නලින්ද ජයතිස්ස මහතා ප්‍රකාශ කළේ, පවතින ගෝලීය තත්ත්වයන් මත ඉන්ධන මිල ඉහළ දැමීමට රජයට සිදුවන බවයි.

කෙසේ වෙතත්, එහිදී ඔහු අවධාරණය කලේ මිල ඉහළ දැමීමක් සිදු කළද, එහි සම්පූර්ණ බර ජනතාව මත පටවන්නේ නැති බවත් මිල වැඩිවීමෙන් සැලකිය යුතු කොටසක් මහා භාණ්ඩාගාරය විසින් දරා ගැනීමට නියමිත බවත්ය.

මිල වැඩිවීමේ තවත් කොටසක් අදාළ ඉන්ධන සමාගම් විසින් දරා ගන්නා අතර, ජනතාවට දැරීමට සිදුවන්නේ යම් ප්‍රමාණයක මිල වැඩිවීමක් පමණි.

ලෝකයේ බොහෝ රටවල් ඉන්ධන පෝලිම් සහ අර්බුදවලට මුහුණ දී සිටියද, ශ්‍රී ලංකාව තුළ ඉන්ධන සහ විදුලි සැපයුම අඛණ්ඩව පවත්වාගෙන යාමට රජය කැපවී සිටී.

පවතින යුදමය තත්ත්වය පහව ගිය වහාම හැකි ඉක්මනින් මෙම මිල ගණන් අඩු කිරීම රජයේ බලාපොරොත්තුවයි.

ජනතාවට තම ආර්ථිකය ශක්තිමත් කර ගැනීමට හැකි වන පරිදි මෙම තත්ත්වය කළමනාකරණය කරන බවද අමාත්‍යවරයා වැඩිදුරටත් සඳහන් කළේය.