බාල ගල් අඟුරු ගෙනාවේ නෑ.. ගෙනා ගල් අඟුරු බාල වුණා..- කෝප් සභාපති

 ගල්අඟුරු ආනයන ක්‍රියාවලිය පිළිබඳ පූර්ණ විමර්ශනයක් අපරාධ පරීක්ෂණ දෙපාර්තමේන්තුව හරහා මේ වනවිට සිදු කරගෙන යන බවත්, එමෙන්ම මීට ඉහත ගල්අඟුරු ආනයන ක්‍රියාවලියේදී යම් සමාගම්වලට හිතාමතාම වංචනික ලෙස වාසිදායක වන අයුරින් කටයුතු කොට තිබේනම් ඒ පිළිබඳ සොයා බැලීමේ වගකීමත් රජය සතුව ඇති බැව් ජාතික ජනබලවේගයේ ගාල්ල දිස්ත්‍රික් මන්ත්‍රී සහ කෝප් කමිටුවේ සභාපති වෛද්‍ය නිශාන්ත සමරවීර මහතා පවසයි.

ගාල්ලේ දී මාධ්‍ය හමුවකදී මන්ත්‍රීවරයා මේ බව සඳහන් කළේය. 

හෙතෙම මෙසේද කීවේය.

“ගල්අඟුරු ආනයන ක්‍රියාවලියේ දී ගල්අඟුරු තත්ත්වයෙන් බාල කියලා දැනුවත්ව ආනයනය කරලා නැහැ. නමුත් ආනයනය කරනු ලැබූ ගල්අඟුරුවල තත්ත්වයේ යම් අඩුවක් තියෙනවා. ලක්විජය බලාගාරයේ දහන ක්‍රියාවලිය මත ඒ බව නිරීක්ෂණය වෙලා තියෙනවා. ඒ මත සිදුවන යම් පාඩුවක් තියෙනවා නම් අදාළ ආයතනවලින් අය කරගත යුතුයි කියන කාරණා පිළිබඳවත් මීට ඉහතදී කරනු ලැබූ ගල්අඟුරු ආනයන ක්‍රියාවලිය තුළ මෙවැනි අවධානයක් යොමු නොවී එම සමාගම්වලට වාසිදායක වන අයුරින් කටයුතු සිදුවූ ආකාරය පිළිබඳ කොප් කමිටුවේ දී සාකච්ඡා වුණා.

ගල්අඟුරු ආනයන ක්‍රියාවලිය පිළිබඳ පූර්ණ විමර්ශනයක් අපරාධ පරීක්ෂණ දෙපාර්තමේන්තුව හරහා සිදු කිරීමටත් මීට ඉහතදී ගල්අඟුරු ආනයන ක්‍රියාවලියේ දී සිදුවූ දුර්වලතා සකස් කළ යුතු වාගේම එම ක්‍රියාවලියේ දී යම් යම් සමාගම්වලට හිතාමතා වංචනික ලෙස වාසිදායක වන අයුරින් කටයුතු කරලා තිබෙනවා නම් ඒ පිළිබඳ සොයා බැලීමේ වගකීමත් රජයට තියෙනවා.

රජය සහ කෝප් කමිටුව විදියට අපි විගණකාධිපතිතුමියගෙන් ඉල්ලීමක් කළා ගල්අඟුරු ආනයන ක්‍රියාවලිය පිළිබඳ පරීක්ෂණ වාර්තාවක් දෙන්න කියලා ජාතික විගණන කාර්යාලය මගින් ඉතා ස්වාධීනව පරීක්ෂණ වාර්තාවක් සපයලා තියෙනවා. අපි ඒ වාර්තාව පදනම් කරගෙන ගල්අඟුරු ආනයන ක්‍රියාවලිය ආරම්භයේ සිට අවසානය දක්වා ක්‍රියාවලිය පිළිබඳ කෝප් කමිටුවේ දී ප්‍රශ්න කළා. ඒ සඳහා ආණ්ඩු පක්ෂයේ මෙන්ම විපක්ෂයේ මන්ත්‍රීවරුද සම්බන්ධ වුණා. මේ සියලුදෙනා සක්‍රීය ලෙස මේ සඳහා දායක වුණා.

ලලිත් චාමින්ද
එස්. කේ. කළුආරච්චි