විශ්වාස භංගය විපක්‍ෂයට පාරාවලල්ලක් වුනා.. සියළුම ගල් අගුරු නැවු ගැන හොයනවා..- මාගලගම

 

බලශක්ති අමාත්‍ය කුමාර ජයකොඩි මහතාට එරෙහිව විපක්ෂය ගෙන ආ විශ්වාසභංග යෝජනාව වැඩි ඡන්ද 104 කින් පරාජයට පත්වීමත් සමඟ එය විපක්ෂයටම එරෙහිව කැරකී ආ "පාරාවළල්ලක්" වී ඇතැයි ජාතික ජන බලවේගයේ පාර්ලිමේන්තු මන්ත්‍රී රුවන් මාපලගම මහතා පවසයි.

විපක්ෂය වෙනුවෙන් කථිකයන් 22 කුගේ නාමලේඛනයක් ඉදිරිපත් කර තිබුණද, ඉන් බොහෝ දෙනෙකු විවාදයට සහභාගී නොවූ බවත්, අමාත්‍යවරයාට එරෙහිව එල්ල කළ චෝදනා සාක්ෂි සහිතව ඔප්පු කිරීමට ඔවුන් අසමත් වූ බවත් මන්ත්‍රීවරයා පෙන්වා දෙයි.

මෙම විවාදයේදී රජය විසින් වැදගත් තීරණයක් ගත් බව පවසන රුවන් මාපලගම මහතා, 2009 වසරේ සිට මේ දක්වා ලංකාවට ගෙන්වා ඇති සියලුම ගල් අඟුරු නැව් පිළිබඳව විමර්ශනය කිරීමට 1978 ආණ්ඩුක්‍රම ව්‍යවස්ථාව යටතේ පූර්ණ බලැති ජනාධිපති කොමිසමක් පත් කරන බව ප්‍රකාශ කළේය.

2009 සිට මෙරටට ගෙන්වා ඇති මුළු ගල් අඟුරු නැව් 465 න්, වත්මන් රජය යටතේ ගෙන්වා ඇත්තේ නැව් 13 ක් පමණක් බවත්, ඉතිරි නැව් 450 කට අධික ප්‍රමාණය ගෙන්වා ඇත්තේ පසුගිය රජයන් සමයේදී බවත් මන්ත්‍රීවරයා අනාවරණය කළේය. ඒ අනුව මෙම කොමිසම හරහා අතීතයේ සිදු වූ සියලු දූෂණ වංචා හෙළිවීමට නියමිත බව හෙතෙම අවධාරණය කරයි.

විශ්වාසභංගයට පදනම් වූ විගණකාධිපති වාර්තාව විපක්ෂයේ ඉල්ලීමක් නොව, 'කෝප්' (COPE) කමිටුවේ සභාපති වෛද්‍ය නිශාන්ත කළ ඉල්ලීමක් අනුව සකස් වූවක් බවද එමෙන්ම, ලංකාවේ විශාලම ටෙන්ඩර් ක්‍රියාත්මක වන ගල් අඟුරු සමාගම ආරම්භ කළ දින සිට මේ දක්වාම ස්ථිර නීති උපදේශකයෙකු හෝ ස්ථිර ගිණුම් තැබීමේ නිලධාරියෙකු නොසිටි බවත්, එවැනි අවුල් සහගත පද්ධතියක් තුළ විපක්ෂය උත්සාහ කළේ ක්‍රමවේදයේ වැරැද්ද නිවැරදි කිරීමට නොව දේශපාලන වාසි ලබා ගැනීමට බවත් මන්ත්‍රීවරයා වැඩිදුරටත් පැවසීය.