ඉරාන නියෝජිතයන් හමුවීම සඳහා ස්ටීව් විට්කොෆ් සහ ජැරඩ් කුෂ්නර් ඇතුළු ඇමරිකානු දූත පිරිස සැලසුම් කර තිබූ පාකිස්තාන සංචාරය වහාම ක්රියාත්මක වන පරිදි අවලංගු කිරීමට ජනාධිපති ඩොනල්ඩ් ට්රම්ප් තීරණය කර තිබේ.
ෆොක්ස් නිව්ස් නාලිකාව සමඟ අද උදෑසන පැවැත්වූ සංවාදයකදී ජනාධිපතිවරයා මේ බව තහවුරු කර ඇත.
මෙම තීරණය සම්බන්ධයෙන් අදහස් දක්වමින් ජනාධිපති ට්රම්ප් සඳහන් කළේ, ඵල රහිත සාකච්ඡා සඳහා තම නියෝජිතයන් පැය 18ක දීර්ඝ ගුවන් ගමනක නිරත වීමේ අවශ්යතාවක් නොමැති බවයි.
"අප සතුව සියලුම ශක්තිමත් සාධක තිබෙනවා. ඔවුන්ට අවශ්ය ඕනෑම වෙලාවක අපට ඇමතුමක් ලබා දිය හැකියි. නමුත් කිසිවක් සිදු නොවන සාකච්ඡා සඳහා මෙවැනි ගමන් යෑමට මම ඉඩ දෙන්නේ නැහැ," යනුවෙන් ඔහු වැඩිදුරටත් ප්රකාශ කර ඇත.
මේ අතර, පාකිස්තාන අග්රාමාත්ය ෂෙහ්බාස් ෂරීෆ් ඇතුළු එරට ඉහළ පෙළේ නිලධාරීන් සමඟ සාකච්ඡා පැවැත්වූ ඉරාන විදේශ අමාත්ය අබ්බාස් අරග්චි ඉස්ලාමාබාද් අගනුවරින් පිටත්ව ගොස් ඇති බව වාර්තා වේ.
තමන් ඇමරිකානු නියෝජිතයන් හමුවීමට කිසිදු සැලසුමක් නොතිබූ බව අරග්චි මීට පෙරද අවධාරණය කර තිබුණි.
ඉරාන රජයේ නිල පුවත් ඒජන්සිය වන IRNA ද තහවුරු කර ඇත්තේ ඉරාන විදේශ අමාත්යවරයා සිය නිල සංචාරය නිමවා පිටත්ව ගිය බවයි.
ප්රාදේශීය සාමය ඇති කිරීමේ අරමුණින් මැදපෙරදිග විශේෂ නියෝජිත ස්ටීව් විට්කොෆ් සහ ජනාධිපතිවරයාගේ බෑණනුවන් වන ජැරඩ් කුෂ්නර් අද දින ඉස්ලාමාබාද් වෙත ළඟා වීමට නියමිතව තිබුණි.
එහෙත් දෙපාර්ශවය අතර පවතින දැඩි මතභේද සහ සෘජු හමුවීමක් සඳහා ඉරානයේ ඇති අකමැත්ත හමුවේ මෙම සාකච්ඡා වටය මෙලෙස බිඳ වැටී ඇත.
