පොලිස් අණ නොතකා යන වාහනවලට එරෙහිව දැඩි බලය භාවිත කරනවා...

 රථවාහන පරීක්ෂාවන් සහ නිවාස සෝදිසි කිරීම්වලදී නීතිය බලාත්මක කරන නිලධාරීන්ට පූර්ණ සහයෝගය ලබා දෙන ලෙස ශ්‍රී ලංකා පොලිසිය මහජනතාවගෙන් දැඩිව ඉල්ලා සිටියි. පොලිස් මාර්ග බාධක මඟහැරීමට උත්සාහ කිරීම හෝ රාජකාරියට බාධා කිරීම් සිදු කරනු ලබන අවස්ථාවලදී නීතිමය පියවර ගැනීමට මෙන්ම, අවශ්‍ය වුවහොත් බලය භාවිත කිරීමට පවා පසුබට නොවන බව පොලිස් මූලස්ථානය අවධාරණය කරයි.

මිනුවන්ගොඩ පොලිස් බලප්‍රදේශය තුළ පිහිටි පොලිස් මාර්ග බාධක තුනකදීම නවත්වන ලෙස දුන් අණ නොතකා ධාවනය වූ සැකකටයුතු වාහනයකට පොලිසිය විසින් වෙඩි ප්‍රහාරයක් එල්ල කිරීමේ සිදුවීමෙන් අනතුරුව පොලිස් මූලස්ථානය මෙම විශේෂ නිවේදනය නිකුත් කර තිබේ.

මේ පිළිබඳව අදහස් දැක්වූ පොලිස් මාධ්‍ය ප්‍රකාශක, සහකාර පොලිස් අධිකාරී එෆ්.යූ. වුට්ලර් මහතා ප්‍රකාශ කළේ, අඛණ්ඩව පොලිස් මාර්ග බාධක මඟහරිමින් ධාවනය වූ මෙම වාහනය තුළ සිටි පුද්ගලයන් කිසියම් නීතිවිරෝධී කටයුත්තකට සම්බන්ධ බවට සාධාරණ සැකයක් මතු වූ බැවින්, නිලධාරීන් විසින් එම වාහනය ලුහුබැඳ ගොස් එය නැවැත්වීම සඳහා ගිනිඅවි භාවිත කළ බවයි.

පසුව මිනුවන්ගොඩට මායිම් වී ඇති සීදූව පොලිස් බලප්‍රදේශයේදී මෙම වාහනය වටලා නැවැත්වීමට පොලිසිය සමත්ව ඇති අතර, එහිදී සැකකරුවන් දෙදෙනෙකු අත්අඩංගුවට ගෙන තිබේ. සිද්ධියට සම්බන්ධ වාහනය ද පොලිස් භාරයට ගෙන ඇත.

මෙලෙස අත්අඩංගුවට ගත් සැකකරුවන් කිසියම් සංවිධානාත්මක අපරාධ කල්ලිවලට සම්බන්ධ ද, නැතහොත් වෙනත් අපරාධයකට සම්බන්ධ වී අපරාධ ස්ථානයකින් පලායෑමට උත්සාහ කළේ ද යන්න අනාවරණය කර ගැනීම සඳහා මිනුවන්ගොඩ පොලිස් ස්ථානාධිපතිවරයාගේ සෘජු අධීක්ෂණය යටතේ විශේෂ විමර්ශන කණ්ඩායම් දෙකක් මගින් පුළුල් පරීක්ෂණ ආරම්භ කර ඇති බව පොලිසිය පවසයි.

නීතිය ක්‍රියාත්මක කරන නිලධාරීන්ගේ නියෝග පැහැර හැරීමට හෝ මඟහැරීමට උත්සාහ කරන ඕනෑම අයෙකුට එරෙහිව වහාම සහ දැඩි ලෙස බලය භාවිත කරන බවට සහකාර පොලිස් අධිකාරී වුට්ලර් මහතා මෙහිදී අනතුරු ඇඟවීමක් ද කළේය.

"ශ්‍රී ලංකා පොලිසිය ඕනෑම අවස්ථාවක ඔබේ නිවසක් හෝ වාහනයක් පරික්ෂා කිරීමට පැමිණියහොත්, ඔබ කිසිදු පැකිලීමකින් තොරව ඊට පූර්ණ සහයෝගය ලබා දිය යුතුයි. එසේ නොමැති වුවහොත් ඔබට බරපතල නීතිමය විපාකවලට මුහුණ දීමට සිදු වෙනවා. අද දින සිදු වූ සිදුවීමේදී ද පොලිස් බලය භාවිත කිරීමට සිදු වූයේ නියෝගවලට අවනත නොවීම හේතුවෙන්" යැයි ද මාධ්‍ය ප්‍රකාශකවරයා වැඩිදුරටත් සඳහන් කළේය.