මෙහෙණි ආරාමයක් ඉදිරිපිට මිණී ඔළුවක්...

 කැලණිය, හුනුපිටිය ප්‍රදේශයේ පිහිටි සංඝමිත්තා මෙහෙණි ආරාමයේ ප්‍රධාන දොරටුව ඉදිරිපිට මිනි හිස්කබලක් තබා තර්ජනය කිරීමේ පුවතක් වාර්තා වේ. මෙම සිද්ධිය සම්බන්ධයෙන් පෑලියගොඩ පොලිසිය මේ වන විට පුළුල් විමර්ශනයක් ආරම්භ කර තිබේ.

අනුරාධපුරයේ පැවති භාවනා වැඩසටහනකට සහභාගී වී යළි ආරාමය වෙත පැමිණි අවස්ථාවේදී, එහි ප්‍රධාන දොරටුව අසල මෙම මිනි හිස්කබල තබා ඇති අයුරු විහාරාධිපති එල්පිටියේ ධම්මකුසුම මෙහෙණින් වහන්සේ විසින් දැක ඇත. වහාම ක්‍රියාත්මක වූ පෑලියගොඩ පොලිසිය එම ස්ථානයට පොලිස් ආරක්ෂාව යොදවා තිබේ.

මෙම සිද්ධියට මුහුණ දුන් මෙහෙණින් වහන්සේ පවසන්නේ, 2024 වසරේ සිට තමන් මෙම ආරාමයේ වැඩසිටින බවත්, එතැන් සිට තමන්ව මෙම ස්ථානයෙන් පන්නා දැමීම සඳහා ප්‍රදේශයේ විහාරස්ථානයක හිමිනමක් ඇතුළු පිරිසක් විවිධ හිරිහැර සිදුකරන බවත්ය.

මීට පෙර ද ආරාමයේ තිබූ බුදු පිළිම වහන්සේ නමකට හානි කර, තාප්ප කඩා දමා තමන්ට බලපෑම් කළ බව උන්වහන්සේ පොලිසියට කළ පැමිණිල්ලේ සඳහන් වේ.

ප්‍රදේශවාසීන් පවසන පරිදි, 26 වැනිදා උදෑසන කාලයේදී එක්තරා ස්වාමීන් වහන්සේ නමක් සුඛෝපභෝගී රථයකින් මෙම ස්ථානයට පැමිණ යන අයුරු දැකගත හැකි වී තිබේ.

සිද්ධිය වාර්තා වීමෙන් පසු, කොළඹ අලුත්කඩේ අංක 05 අධිකරණයේ වැඩබලන මහේස්ත්‍රාත් ලියන් පුංචිහේවා මහතා පසුගිය 27 වැනිදා සවස එම ස්ථානයට පැමිණ ස්ථානීය පරීක්ෂාවක් සිදු කළේය.

මහේස්ත්‍රාත්වරයාගේ නියෝගය මත මිනි හිස්කබල පරීක්ෂණ සඳහා පොලිස් භාරයට ගෙන ඇති අතර, මෙහෙණින් වහන්සේට යළි ආරාමය තුළට වැඩම කිරීමට අවසර ලබා දී ඇත.

මෙම ක්‍රියාව සිදුකළ පුද්ගලයන් හඳුනාගෙන අත්අඩංගුවට ගැනීම සඳහා පෑලියගොඩ පොලිසියේ අපරාධ අංශය වැඩිදුර පරීක්ෂණ පවත්වයි.