බුද්ධි අංශ හා හමුදාවේ අය ලවා මිලේච්ච අපරාධ කරවලා..- ජනපති

 ශ්‍රී ලංකාව අසිෂ්ට රාජ්‍යයක සිට ශිෂ්ට සම්පන්න රාජ්‍යයක් බවට පරිවර්තනය කිරීමේ දැඩි අභිප්‍රායක් රජය සතු බවත්, අතීතයේදී යම් දේශපාලන කඳවුරක හෝ පවුලක බලය වෙනුවෙන් බුද්ධි අංශ හා හමුදාවේ කුඩා කණ්ඩායම් යොදවා සිදුකළ මිලේච්ඡ අපරාධ සම්බන්ධයෙන් නීතිය තදින්ම ක්‍රියාත්මක කරන බවත් ජනාධිපති අනුර කුමාර දිසානායක මහතා පාර්ලිමේන්තුවේදී අවධාරණය කළේය.

රටේ ආරක්ෂාව සහ ජනතාවගේ ආරක්ෂාව වෙනුවෙන් පෙනී සිටින බුද්ධි අංශ හා හමුදාව සැමවිටම ගෞරවයට පාත්‍ර විය යුතු වුවද, ඔවුන් අතර සිටි කුඩා කණ්ඩායම් පටු දේශපාලන උවමනාවන් සඳහා භාවිත කර ඇති බව ජනාධිපතිවරයා මෙහිදී පෙන්වා දුන්නේය. එම කණ්ඩායම් විසින් සිදුකරන ලද මිනීමැරුම් සහ පැහැරගැනීම් හුදු සිවිල් ගැටුම් නොවන බවත්, ඒවා රාජ්‍ය යාන්ත්‍රණය යොදාගනිමින් කළ සැලසුම් සහගත අපරාධ බවත් ඔහු වැඩිදුරටත් ප්‍රකාශ කළේය.

ලසන්ත වික්‍රමතුංග ඝාතනය, ප්‍රගීත් එක්නැලිගොඩ පැහැරගැනීම, උපාලි තෙන්නකෝන්, පෝද්දල ජයන්ත සහ නාමල් වැනි මාධ්‍යවේදීන්ට හා සිවිල් ක්‍රියාකාරිකයන්ට එල්ල වූ ප්‍රහාර මෙම අඳුරු ඉතිහාසයේ කොටස්කරුවන් බව ජනාධිපතිවරයා සිහිපත් කළේය.

එමෙන්ම තාජුඩීන් ඝාතනය, පාස්කු ප්‍රහාරය, සිරස සහ සියත ආයතනවලට එල්ල කළ ප්‍රහාර මෙන්ම රතුපස්වල ජනතා මර්දනය පිටුපස ද මෙවැනි ක්‍රියාන්විතයන් තිබූ බව ඔහු සඳහන් කළේය.

"අංක තහඩු නැති සුදු වෑන් වලින් සිදුවූ පැහැරගැනීම් සහ ඝාතනයන් පිළිබඳව නීතිය ක්‍රියාත්මක කිරීමට අපේ ආණ්ඩුව කිසිසේත් පසුබට වන්නේ නැහැ. මෙය හමුදාවේ කීර්තිය සහ රාජ්‍යයේ ශිෂ්ට සම්පන්නභාවය වෙනුවෙන් කළ යුත්තක්" යැයි ජනාධිපතිවරයා පවසා සිටියේය.

මෙම විමර්ශනවලට විරුද්ධ විය හැක්කේ එම අපරාධවලින් වාසි ලබාගත් හෝ බලය තහවුරු කරගත් අයට පමණක් බවත්, සාමාන්‍ය සිවිල් පුරවැසියන්ට මෙහිදී බිය වීමට හේතුවක් නොමැති බවත් ඔහු පැහැදිලි කළේය,.

තවද, මෙම අපරාධ පිළිබඳව විමර්ශනය කරන ශානි අබේසේකර, දිලීප පීරිස් වැනි නිලධාරීන්ට සහ අධිකරණ ක්ෂේත්‍රයේ නිලධාරීන්ට එල්ල වන තර්ජන හමුවේ රජය ඔවුන් වෙනුවෙන් පෙනී සිටින බව ජනාධිපතිවරයා මෙහිදී සහතික විය.

තනි තනිව නිලධාරීන් බියවද්දා මෙම යුක්තිය ඉටුකිරීමේ ව්‍යායාමය නතර කිරීමට කිසිවෙකුට ඉඩ නොදෙන බවත්, ඒ සඳහා සමස්ත ජනතාවගේ සහයෝගය අපේක්ෂා කරන බවත් ජනාධිපති අනුර කුමාර දිසානායක මහතා වැඩිදුරටත් කියා සිටියේය