පකිස්ථාන හමුදාව විසින් ඇෆ්ගනිස්ථාන දේශසීමා පළාත් ඉලක්ක කරගනිමින් කළ ප්රබල ගුවන් සහ ගොඩබිම් ප්රහාරවලින් පුද්ගලයන් රැසක් මියගොස් ඇත.
ඇෆ්ගනිස්ථානයේ තලේබාන් රජය පවසන පරිදි, මෙම ප්රහාරවලින් කාන්තාවන් සහ ළමුන් ඇතුළු සිවිල් වැසියන් අවම වශයෙන් 36 දෙනෙකු මියගොස් ඇති අතර තවත් 160කට අධික පිරිසක් තුවාල ලබා ඇත. තලේබාන් පාලනාධිකාරිය මෙම ප්රහාරය හඳුන්වා දුන්නේ බියගුලු ක්රියාවක් සහ ම්ලේච්ඡ අපරාධයක් ලෙසයි.
කෙසේ වෙතත්, පකිස්ථාන තොරතුරු අමාත්ය අටාවුල්ලා තාරර් මහතා ප්රකාශ කළේ සටන්කාමීන්ගේ මධ්යස්ථාන ඉලක්ක කර එල්ල කළ ප්රහාරවලින් සටන්කාමීන් 29 දෙනෙකු මියගිය බවයි.
මෑතකදී පකිස්ථානය තුළ සිදුවූ ත්රස්ත ප්රහාරවලට ප්රතිචාර වශයෙන් මෙම මෙහෙයුම දියත් කළ බව ඔහු වැඩිදුරටත් සඳහන් කළේය.
පසුගිය සෙනසුරාදා කරච්චි නුවර පිහිටි පකිස්ථාන Sindh Rangers මූලස්ථානයකට එල්ල වූ මරාගෙන මැරෙන බෝම්බ ප්රහාරයකින් සෙබළුන් තිදෙනෙකු මියයාම මෙම හමුදා ක්රියාමාර්ගයට ආසන්නතම හේතුව වී තිබේ. ම ප්රහාරයේ වගකීම TTP සංවිධානයේ කොටසක් වන ‘ජමාත්-උල්-අහ්රාර්’ කණ්ඩායම භාරගෙන ඇත.
ඇෆ්ගනිස්ථානයේ පක්ටියා, පක්ටිකා සහ කුනාර් යන දේශසීමා පළාත්වලට මෙම ප්රහාර එල්ල වී ඇති අතර, පක්ටිකා පළාතේ මැන්ඩොඛයිල් ගම්මානයට දැඩි හානි සිදුව ඇති බව වාර්තා වේ. තම රටට එරෙහිව දේශසීමා හරහා ප්රහාර එල්ල කරන ත්රස්ත කණ්ඩායම්වලට ඇෆ්ගනිස්ථානය රැකවරණය ලබා දෙන බවට පකිස්ථානය දිගින් දිගටම චෝදනා කරන නමුත් තලේබාන් රජය එම චෝදනා ප්රතික්ෂේප කරයි.
පසුගිය ඔක්තෝබර් මාසයේදී දෙරට අතර ඇති කරගත් සටන්විරාම එකඟතාව මේ වන විට මුළුමනින්ම බිඳ වැටී ඇති අතර, පසුගිය මාස කිහිපය පුරාම දේශසීමා ගැටුම් හේතුවෙන් විශාල පිරිසක් මියගොස් තිබේ. පසුගිය මාර්තු මාසයේදී ද පකිස්ථානය විසින් කාබුල්හි මත්ද්රව්ය පුනරුත්ථාපන මධ්යස්ථානයකට එල්ල කළ ප්රහාරයකින් සිය ගණනක් මියගිය බව වාර්තා විය.
