හැකර්ලා ඩොලර් උස්සනවාට අලුත් නීති..

 කූට උපක්‍රම මඟින් මෙරටින් අතිවිශාල විදේශ විනිමය ප්‍රමාණයක් විදේශගත කිරීම පාලනය කිරීම සඳහා රජය විසින් ඉදිරියේදී නව නීතිමය පියවර ගන්නා බව මහජන ආරක්ෂක අමාත්‍ය ආනන්ද විජේපාල මහතා අනාවරණය කළේය.

මේ හරහා නීති විරෝධී ලෙස මුදල් විශුද්ධිකරණයේ යෙදෙන ජාවාරම්කරුවන් මැඩපැවැත්වීම අපේක්ෂා කෙරේ. 

පසුගිය වකවානුව තුළ ආනයන කටයුතු සඳහා මුදල් ගෙවන බව පෙන්වමින් අතීතයේදී ඇමෙරිකානු ඩොලර් මිලියන 85 ක මුදලක් මෙරටින් පිටත් කර හැර ඇත.

එක්තරා ව්‍යාපාරික ආයතනයක් විසින් අවස්ථා 953 කදී රුපියල් බිලියන 12.89 ක මුදලක් (ඇමෙරිකානු ඩොලර් මිලියන 42.7 ක්) විවිධ රටවල් 26 ක පිහිටි සමාගම් 256 ක් වෙත බැර කර තිබේ.

තවත් ආයතනයක් විසින් බැංකු ගිණුම් 4 ක් උපයෝගී කරගනිමින් රුපියල් බිලියන 13 කට ආසන්න මුදලක් නීති විරෝධී ලෙස රටින් බැහැර කර ඇත.

ඔවුන් එම මුදල් යොදවා ඇත්තේ රන් ආභරණ සහ යකඩ බඩු වැනි දෑ මිලදී ගැනීමට බව ව්‍යාජ ලෙස පෙන්වමිනි. 

මෙවැනි මූල්‍ය අපරාධ ඉදිරියටත් සිදු වීම වැළැක්වීම සඳහා 2017 වසරේ පනවන්නට යෙදුණු අංක 12 දරන විදේශ විනිමය පනතෙහි පවතින දුර්වලතා මඟහැරවිය යුතු බව අමාත්‍යවරයා පෙන්වා දුන්නේය.

විශේෂයෙන්ම 2006 අංක 5 දරන මුදල් විශුද්ධිකරණය වැළැක්වීමේ පනතේ ඇතුළත් වැදගත් රෙගුලාසි කිහිපයක් 2017 වසරේදී ඉවත් කර තිබීම මෙයට හේතුවක් වී ඇත. 

මේ වන විටත් ජනාධිපතිවරයා සහ ශ්‍රී ලංකා මහ බැංකුවේ නිලධාරීන් අතර මේ පිළිබඳව විශේෂ සාකච්ඡාවක් පවත්වා ඉදිරි කටයුතු සැලසුම් කර ඇති බවද අමාත්‍ය විජේපාල මහතා වැඩිදුරටත් ප්‍රකාශ කළේය.