පාස්කු නඩුවේ ඊබ‍්‍රාහිම්ට එරෙහි සාක්කිකාරිය රටින් ගිහින්.. ඊබ‍්‍රාහිම්ට නිදහස් වෙන්න අවස්ථාවක්...

 

පාස්කු ප්‍රහාරය සම්බන්ධයෙන් චෝදනා ලැබ සිටින මොහොමඩ් ඊබ්‍රහිම් ට එරෙහි නඩුවේ ප්‍රධානතම සාක්ෂිකාරිය මෙරටින් පිටව ගොස් ඇති බවත්, ඒ හරහා ඔහුට නඩුවෙන් නිදහස් වීමේ අවස්ථාවක් උදාවී ඇති බවත් පිවිතුරු හෙළ උරුමයේ නායක, හිටපු අමාත්‍ය උදය ගම්මන්පිල මහතා පවසයි.

ඊබ්‍රහිම් ට එරෙහිව නීතිපතිවරයා නඩු පවරා තිබුණේ ත්‍රස්තවාදී ප්‍රහාරයක් පිළිබඳ තොරතුරු දැනගෙන එය ආරක්ෂක අංශ වෙත දැනුම් නොදීම සහ ත්‍රස්තවාදයට අනුබල දීම යන චෝදනා යටතේය.

 මෙම නඩුවේ ප්‍රධානතම සාක්ෂිකාරිය වූයේ ඔහුගේ නිවසේ මෙහෙකාරිය ලෙස සේවය කළ කාන්තාව බව ගම්මන්පිල මහතා සඳහන් කරයි.

කෙසේ වෙතත්, මෙම නඩුව කැඳවූ අවස්ථාවේදී, අදාළ සාක්ෂිකාරිය විදේශ රැකියාවකට ගොස් ඇති බව නීතිපතිවරයා විසින් අධිකරණයට දැනුම් දී තිබේ.

ප්‍රධාන සාක්ෂිකාරිය අතුරුදන් වීම හෝ විදේශගත වීම හරහා ඊබ්‍රහිම් ට චෝදනා වලින් නිදහස් වී සුද්ධ වී එළියට ඒමට මග පෑදී ඇති බව හිටපු අමාත්‍යවරයා අවධාරණය කරයි.

පාස්කු ප්‍රහාරය වෙනුවෙන් ඊබ්‍රහිම් ගේ පුතුන් දෙදෙනෙකු, ලේලියක සහ මුණුබුරන් දෙදෙනෙකු බිලි දුන් බවත්, පසුගිය රජය ඔහුට සැලකීමක් නොකළද වත්මන් මාලිමා රජය ඔහුට කළගුණ සලකමින් සිටින බවත් ගම්මන්පිල මහතා ප්‍රකාශ කළේය.

තවද, ඉතිහාසයේ ප්‍රථම වතාවට රහස් පොලිස් විමර්ශනයක ප්‍රධාන සැකකරුවෙකු එම දෙපාර්තමේන්තුවේ අධ්‍යක්ෂ ධූරයටත්, තවත් සැකකරුවෙකු පොලිසිය භාර අමාත්‍යාංශයේ ලේකම් ධූරයටත් පත් කර ඇති බව පවසන ඒ මහතා, ස්වාධීන විමර්ශනයක් වෙනුවට සැකකරුවන් ලවාම විමර්ශන සිදු කිරීමට කාදිනල්තුමාට අවශ්‍ය වූයේ මන්දැයි යන්න ජනතාවට පිළිතුරු දිය යුතු ප්‍රශ්නයක් බවද වැඩිදුරටත් සඳහන් කළේය