ඉන්ධන මිල ඉහල දැම්මේ අපේ වැරැද්දකින් නොවේ.. ලෝකෙ වැරැද්දක් නිසා.. අපට තව අවස්ථාව දෙන්න..

 වත්මන් බලශක්ති අර්බුදය සහ ඉන්ධන මිල ඉහළ යාම රට අභ්‍යන්තරයේ ඇති වූ බිඳවැටීමක් හෝ පාලකයන් ගත් වැරදි තීරණ නිසා සිදු වූවක් නොවන බව ජාතික ජන බලවේගයේ පාර්ලිමේන්තු මන්ත්‍රී අසිත නිරෝෂන් මහතා ප්‍රකාශ කරයි. 

ඔහු පෙන්වා දෙන්නේ මෙය ලෝකයේ පවතින යුදමය තත්ත්වය හේතුවෙන් ඇති වූ ගෝලීය බලපෑමක් බවයි.

මන්ත්‍රීවරයා මේ බව සඳහන් කළේ ඉන්ධන මිල ඉහළ යාම සම්බන්ධයෙන් අදහස් දක්වමිනි. 

එහිදී ඔහු වැඩිදුරටත් කියා සිටියේ ඉන්දියාව, වියට්නාමය සහ සිංගප්පූරුව වැනි ශක්තිමත් ආර්ථිකයන් සහිත රටවලට පවා මෙම ගෝලීය තත්ත්වය දැඩි ලෙස බලපා ඇති බවයි.

විශේෂයෙන්ම අසල්වැසි ඉන්දියාවේ තත්ත්වය පිළිබඳව අදහස් දක්වමින් මන්ත්‍රීවරයා පෙන්වා දුන්නේ, පසුගිය සති කිහිපය තුළ ඉන්දියාව සිව් වතාවක් ඉන්ධන මිල ඉහළ දැමූ බවයි. 

එමෙන්ම ලෝකයේ වේගයෙන්ම අවප්‍රමාණය වන මුදල් ඒකකය බවට පසුගිය කාලයේ ඉන්දීය රුපියල පත් වූ බව ද ඔහු සිහිපත් කළේය.

ලෝක මට්ටමින් සිදුවන මෙම ඉන්ධන මිල ඉහළ යාම වළක්වා ගැනීම කිසිවෙකුට කළ නොහැකි බවත්, පවතින දුෂ්කර තත්ත්වය හමුවේ රජයට යම් අවස්ථාවක් ලබා දෙන ලෙසත් මන්ත්‍රී අසිත නිරෝෂන් මහතා මෙහිදී ජනතාවගෙන් ඉල්ලා සිටියේය.