සුරේෂ් සලේට නීතීඥ සහාය දිනපතා නොදෙන්න තීරණය කරයි...

අපරාධ පරීක්ෂණ දෙපාර්තමේන්තුවේ නියෝග මත රඳවාගෙන සිටියදී දියත් කළ උපවාසයක් හේතුවෙන් කොළඹ ජාතික රෝහලට ඇතුළත් කර සිටින විශ්‍රාමික මේජර් ජෙනරාල් සුරේෂ් සලේ මහතාට, දිනපතා තම නීතිඥවරයා මුණගැසීමට ඇති අවස්ථාව අපරාධ පරීක්ෂණ දෙපාර්තමේන්තුව විසින් වළක්වා තිබේ.

මෙම තීරණය සම්බන්ධයෙන් අධ්‍යක්ෂ ශානි අබේසේකර මහතා විසින් සුරේෂ් සලේ මහතාගේ බිරිඳ වන මනෝරි සලේ මහත්මිය වෙත නිල වශයෙන් ලිඛිතව දැනුම් දී ඇත.

තම සැමියාට සතියේ දින පහ තුළම ඔහුගේ නීති උපදේශක වන අසිත සිරිවර්ධන මහතාව හමුවීමට පහසුකම් සලසන ලෙස මනෝරි සලේ මහත්මිය ආයතනයෙන් ඉල්ලීමක් කර තිබුණි. එහෙත් එම ඉල්ලීමට ප්‍රතිචාර දක්වමින් අපරාධ පරීක්ෂණ දෙපාර්තමේන්තු අධ්‍යක්ෂවරයා පෙන්වා දී ඇත්තේ, සැකකරු මේ වන විට ප්‍රශ්න කිරීම්වලින් බැහැරව වෛද්‍ය ප්‍රතිකාර ලබමින් පසුවන බැවින් මෙම වකවානුව තුළ නීතිමය උපදෙස් ලබාගැනීමේ හදිසි අවශ්‍යතාවයක් පැන නොනගින බවයි.

නිරන්තරයෙන් නීතිඥවරුන් හමුවීම සැකකරුගේ මානසික නිදහසට බාධාවක් විය හැකි අතර, එය ඔහුගේ සෞඛ්‍ය තත්ත්වය තීරණාත්මක ලෙස පිරිහීමට හේතු විය හැකි බව ද අදාළ ලිපියෙන් අවධාරණය කර ඇත. තවද, අධිකරණ තීන්දුවකට අනුව දැනටමත් සෑම සතියකම බදාදා දිනයේ පමණක් නීතිඥවරයාට ඔහුව හමුවීමට අවසර දී ඇති බව එහි සඳහන් වේ.

ඒ අනුව නීතිඥ අසිත සිරිවර්ධන මහතාට සුරේෂ් සලේ මහතාව හමුවිය හැක්කේ සතිපතා එළඹෙන බදාදා දිනවලදී පමණි. පවුලේ සාමාජිකයින්ට බිරිඳ, දියණිය සහ පුත්‍රයා යන අයට දිනපතාම ඔහුව බැලීමේ අවස්ථාව උදාකර දී ඇති බැවින්, මින් ඉදිරියට දෛනිකව නීතිඥ සහාය ලබා දීමට කටයුතු කළ නොහැකි බව CID අධ්‍යක්ෂවරයා වැඩිදුරටත් දැනුම් දී තිබේ.