හිටපු ප‍්‍රබලයන් රැසකගේ දේපල විමර්ශණ වේගවත් කරයි..

දේශපාලන ක්ෂේත්‍රයේ සහ රාජ්‍ය අංශයේ ඉහළ තනතුරු දැරූ ප්‍රමුඛ පුද්ගලයන් තිස්දෙනෙකුට ආසන්න සංඛ්‍යාවකගේ වත්කම් සම්බන්ධයෙන් සිදුකෙරෙන විමර්ශන කටයුතු වඩාත් වේගවත් කිරීමට පියවර ගෙන ඇති බව ආරංචි මාර්ගවලින් වාර්තා වේ. 

මෙම විශේෂ විමර්ශන සඳහා ප්‍රධාන වශයෙන්ම පාදක වී ඇත්තේ 2020 වසරේ සිට 2024 වසර දක්වා වූ කාලසීමාව තුළ මෙරට දේශපාලන අධිකාරියේ සහ පරිපාලනයේ බලගතු නිලතල දැරූ පිරිසකි.

වත්මන් විමර්ශන ක්‍රියාවලිය යටතේ, අපරාධ පරීක්ෂණ දෙපාර්තමේන්තුව (CID) මඟින් දැනට පවත්වාගෙන යනු ලබන ඇතැම් වත්කම් පරීක්ෂණ ගොනු, ඉදිරි නීතිමය පියවර ගැනීම සඳහා අල්ලස් හෝ දූෂණ චෝදනා විමර්ශන කොමිෂන් සභාව වෙත පැවරීමටද කටයුතු යොදමින් පවතී.

මෙලෙස වත්කම් පිළිබඳ දැඩි පරීක්ෂාවට ලක්ව සිටින පිරිස අතර මෙරට දේශපාලන කරළියේ සිටින ප්‍රබල චරිත රැසක් ඇතුළත් වන බව අනාවරණය වී ඇත.