රෝහලේ සිටින සුරේෂ් සලේට බරපතලයි...?

 

රාජ්‍ය බුද්ධි සේවයේ හිටපු අධ්‍යක්ෂ සුරේෂ් සලේ මහතාගේ සෞඛ්‍ය තත්ත්වය ශීඝ්‍රයෙන් පහළ යමින් පවතින බව ඔහුගේ සමීපතමයන් පවසයි.

ඔහුගේ සෞඛ්‍ය පිරිහීම ජීවිත අවදානමක් දක්වා වර්ධනය විය හැකි බවට ද පවුලේ ඥාතීන් බිය පළ කරති.

වෛද්‍ය ප්‍රතිකාර ලබමින් පසුවන ඒ මහතාගේ සුවදුක් විමසීම සඳහා අද (12) ඥාතීන් රෝහල වෙත ගොස් ඇති අතර, එහිදී දැකගත හැකි වූ තත්ත්වය හේතුවෙන් ඔවුහු දැඩි කනස්සල්ලට පත්ව සිටිති.

ඥාතීන් පෙන්වා දෙන්නේ සුරේෂ් සලේ මහතා මේ වන විට දැඩි සායනික අපහසුතාවන්ට මුහුණ දෙමින් සිටින බවයි.

රෝහල් ඇඳ මත සිටින ඔහුගේ ශාරීරික ස්වභාවය අතිශය වෙහෙසකර මෙන්ම සුදුමැලි වී ඇති බව ද ඔවුහු සඳහන් කරති.

ඔහුට සාමාන්‍ය පරිදි අදහස් හුවමාරු කර ගැනීමට අපහසු වී ඇති අතර, වචන ගළපා අඛණ්ඩව කතා කිරීමේ හැකියාව සීමා වී පවතී.

තද උණ තත්ත්වයක් ද සමඟින් ශ්වසන අපහසුතා මතු වීම හේතුවෙන් ඔහුට ඇඳ මත ඍජුව වාඩි වී සිටීමට පවා දැඩි ආයාසයක් දැරීමට සිදුව ඇත.

දෑත් අධික ලෙස ඉදිමීම හේතුවෙන් ඖෂධ හෝ සේලයින් දියර ශරීරගත කිරීම සඳහා සාමාන්‍ය පරිදි කැන්යුලාවක් ඇතුළත් කිරීමට වෛද්‍ය කණ්ඩායමට බාධා මතු වී තිබේ.

අනතුරුව ඔහුගේ දකුණු වැලමිට අසලින් කැන්යුලාවක් සම්බන්ධ කිරීමට වෛද්‍යවරුන් පියවර ගෙන ඇත.