සලේ බලන්න දෙන්නැයි බිරිද කල ඉල්ලීම අධිකරණයෙන් ඉවත දමයි...

 ත්‍රස්තවාදය වැළැක්වීමේ පනත යටතේ අපරාධ පරීක්ෂණ දෙපාර්තමේන්තුවේ රැඳවුම් භාරයේ පසුවන, රාජ්‍ය බුද්ධි සේවයේ හිටපු ප්‍රධානී විශ්‍රාමික මේජර් ජෙනරාල් සුරේෂ් සලේ මහතා දැනට කොළඹ ජාතික රෝහලේ නේවාසිකව ප්‍රතිකාර ලබයි.

පාස්කු ඉරුදින එල්ල වූ බෝම්බ ප්‍රහාර මාලාවට අදාළ විමර්ශන හේතුවෙන් මෙලෙස රඳවාගෙන සිටින ඔහුව දිනපතා බැහැදැකීම සඳහා අවස්ථාව සලසා දෙන ලෙස ඉල්ලා ඔහුගේ බිරිඳ සහ නීතිඥවරයා අපරාධ පරීක්ෂණ දෙපාර්තමේන්තුවේ අධ්‍යක්ෂ ශානි අබේසේකර මහතා වෙත ලිඛිත ඉල්ලීම් ඉදිරිපත් කර තිබේ.

සුරේෂ් සලේ මහතා තමන්ව රඳවා තබා ගැනීමට නිකුත් කර ඇති නියෝගය බලරහිත කරන ලෙස ඉල්ලා අභියාචනාධිකරණය හමුවේ රීට් පෙත්සමක් ගොනු කර තිබුණි. එම පෙත්සම වැඩිදුර විභාග කිරීම ලබන ජූලි මස 10 වනදා දක්වා කල් තැබීමට අභියාචනාධිකරණය නියෝග කර ඇත.

මේ අතරතුර, මෙම සිදුවීමට අදාළ නඩුව ඊයේ කොටුව මහේස්ත්‍රාත් අධිකරණයේදී කැඳවනු ලැබීය. එහිදී සැකකාර සලේ මහතා වෙනුවෙන් පෙනී සිටි නීතිඥ මඩුල්ල අධිකරණයෙන් ඉල්ලා සිටියේ රෝහලේ සාමාන්‍ය රෝගීන් බැලීමේ වේලාවන් තුළ ඔහුගේ බිරිඳට සහ පුත්‍රයාට ඔහුව හමුවීමට අවසර දෙන ලෙසයි.

නමුත් එම ඉල්ලීම ප්‍රතික්ෂේප කළ කොටුව මහේස්ත්‍රාත් පසන් අමරසේන මහතා ප්‍රකාශ කළේ, සැකකරු පසුවන්නේ ත්‍රස්තවාදය වැළැක්වීමේ පනතේ රෙගුලාසි යටතේ වන රැඳවුම් භාරයක බැවින්, එවැනි නියෝගයක් නිකුත් කිරීමට තමන්ට නීතිමය ප්‍රතිපාදන නොමැති බවයි.

අධිකරණයෙන් මෙම සහනය අහිමි වීමත් සමඟ, සලේ මහතාගේ බිරිඳ අපරාධ පරීක්ෂණ දෙපාර්තමේන්තුවේ අධ්‍යක්ෂවරයා වෙත සෘජුවම ලිපියක් යොමු කරමින් සිය ස්වාමිපුරුෂයා දිනපතා බැලීමට අවසර ඉල්ලා සිටියාය.

ඊට සමගාමීව, සුරේෂ් සලේ මහතාගේ අයිතිවාසිකම් සහ සුබසාධනය පිළිබඳව නිරන්තරයෙන් සොයා බලා ඒ පිළිබඳ කරුණු අධිකරණයට වාර්තා කිරීමට තමන්ට වෘත්තීයමය බැඳීමක් ඇති බැවින්, රෝහලේ සිටින සිය සේවාදායකයා දිනපතා හමුවීමට අවසර දෙන ලෙස ඉල්ලමින් ඔහුගේ නීතිඥ අසිත් සිරිවර්ධන මහතා ද අපරාධ පරීක්ෂණ දෙපාර්තමේන්තු අධ්‍යක්ෂවරයා වෙත වෙනම ලිපියක් යොමු කර ඇත.