යෝෂිත රාජපක්‍ෂ අත්අඩංගුවට ගනී..

 හිටපු ජනාධිපති මහින්ද රාජපක්ෂ මහතාගේ පුත්‍රයෙකු වන යෝෂිත රාජපක්ෂ මහතා අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් අද (17) අත්අඩංගුවට ගනු ලැබීය.

ඔහු ශ්‍රී ලංකා නාවික හමුදාවට ඇතුළත් වීම සහ බ්‍රිතාන්‍ය රාජකීය නාවික හමුදා ඇකඩමියේ (Britannia Royal Naval College) පුහුණුව ලැබීම යන ක්‍රියාවලීන්ට අදාළව සිදු කෙරෙන පරීක්ෂණයකට ප්‍රකාශයක් ලබා දීම සඳහා අද උදෑසන අල්ලස් කොමිසම හමුවේ පෙනී සිටි අවස්ථාවේදී මෙම පියවර ගෙන තිබේ.

මෙම විමර්ශනය සඳහා පසුගිය ජුනි 16 වැනිදා කොමිසම හමුවට පැමිණෙන ලෙස යෝෂිත රාජපක්ෂ මහතාට දැනුම් දී තිබුණද, එදින අභියාචනාධිකරණයේ විභාග වූ නඩු කටයුත්තකට සහභාගී වීමට තිබීම හේතුවෙන් තමන්ට පැමිණිය නොහැකි බව ඔහු ලිඛිතව දැනුම් දී තිබුණි. ඒ අනුව ඔහුට අද (17) දිනයේ පෙනී සිටීමට නැවත දැනුම් දී ඇත.

මෙම සිද්ධියට අදාළව එවකට නාවික හමුදාපතිවරයාව සිටි අද්මිරාල් ඔෆ් ද ෆ්ලීට් වසන්ත කරන්නාගොඩ මහතාටද අල්ලස් කොමිසම හමුවේ පෙනී සිටින ලෙස දන්වා තිබුණද, අදාළ කැඳවීම් ලිපිය තමන්ට නොලැබුණු බව ඔහු ප්‍රකාශ කිරීම නිසා ලබන සතියේදී පැමිණෙන ලෙස ඔහුට යළි දැනුම් දී තිබේ.

2006 සැප්තැම්බර් මාසයේදී එවකට නාවික හමුදාපති වසන්ත කරන්නාගොඩ මහතා බ්‍රිතාන්‍ය නාවික හමුදා ඇකඩමිය වෙත ලිපියක් යවමින් යෝෂිත රාජපක්ෂව ඊට බඳවා ගත හැකිදැයි විමසා ඇත. නොවැම්බර් මාසයේදී ඊට ප්‍රතිචාර දැක්වූ ඇකඩමිය, එය කළ හැක්කේ පූර්ණ ශිෂ්‍යත්වයක් මත නොව ගෙවීම් පදනම මත බව දන්වා තිබේ. ඒ අනුව 2007 ජනවාරි මාසයේදී එහි ගිය ඔහු, රජයේ ප්‍රතිපාදන මත වසර එකහමාරකට ආසන්න කාලයක් පුහුණුව ලබා ඇත.

නාවික හමුදාවේ කැඩෙට් නිලධාරියෙකු ලෙස බැඳීමට නම් උසස් පෙළ විභාගය ගණිත හෝ ජීව විද්‍යා අංශයෙන් සමත් විය යුතු වුවද, යෝෂිත රාජපක්ෂ මහතා කලා අංශයෙන් උසස් පෙළ හදාරා තිබීම නිසා මුලින් තිබූ සුදුසුකම් පරිපාටිය වෙනස් කර, නැවත ගැසට්/දැන්වීම් පළකර ඔහුව බඳවා ගෙන ඇති බව අල්ලස් කොමිසමේ පරීක්ෂණවලදී අනාවරණය වී තිබේ.