රජය 120ට ගත්ත වී 100ට විකුණනවා.. වී අලෙවි මණ්ඩල ඉතිහාසයේ ලොකුම පාඩුව මෙයයි...

වී අලෙවි මණ්ඩලය සතු ගබඩා මෙතෙක් පැවති පැරණි වී තොගවලින් පිරී පැවතීම හේතුවෙන්, උතුරු සහ නැගෙනහිර පළාත්වල වත්මන් යළ කන්නයේ අලුත් වී අස්වැන්න මිලදී ගැනීමේ ක්‍රියාවලිය දැඩි ලෙස ප්‍රමාද වී ඇති බව ජාතික ගොවි එකමුතුව චෝදනා කරයි.

එම සංගමයේ සභාපති අනුරාධ තෙන්නකෝන් මහතා පෙන්වා දෙන්නේ, ත්‍රිකුණාමලය, මඩකලපුව, මුලතිව්, මන්නාරම සහ වවුනියාව යන දිස්ත්‍රික්කවල කුඩා වාරිමාර්ග යටතේ අස්වනු නෙළීම මේ වන විට ආරම්භ වී තිබුණ ද, ගොවීන්ට සිය අස්වැන්න රජයට අලෙවි කිරීමට නොහැකි වී ඇති බවයි.

වී අලෙවි මණ්ඩලය සතු ගබඩාවල මේ වන විට වී මෙට්‍රික් ටොන් 120,000ක් පමණ පවතින අතර, ඒවා ඉවත් කිරීමේ ක්‍රියාවලිය රජය විසින් ආරම්භ කර ඇත්තේ ඉතා මන්දගාමීවය. උතුරු සහ නැගෙනහිර පළාත්වල ගබඩාවලින් වී මෙට්‍රික් ටොන් 15,000ක් ඉවත් කිරීම සඳහා වන ටෙන්ඩර් පත් කැඳවා ඇති අතර, ඒවා විවෘත කිරීමට නියමිතව ඇත්තේ ලබන ජූලි මස 08 වැනිදාය. මෙම ක්‍රියාවලිය අවසන් වීමට තවත් සති දෙකක පමණ කාලයක් ගතවනු ඇති බැවින් ගොවීන්ට සිය අස්වැන්න විකුණා ගැනීමට තවදුරටත් බලා සිටීමට සිදුව ඇත.

රජයේ මෙම වී අලෙවි කිරීමේ ක්‍රියාවලිය තුළ මහා පරිමාණ මූල්‍ය වංචාවක් සහ අලාභයක් සිදුවන බවට ද අනුරාධ තෙන්නකෝන් මහතා චෝදනා කළේය.

"රජය රුපියල් 120 බැගින් මිලදී ගත් වී මෙට්‍රික් ටොන් 15,000ක ප්‍රමාණය පෞද්ගලික අංශයට රුපියල් 100 බැගින් විකිණීමට සූදානම් වෙනවා. මෙහෙයුම් වියදම් ද ඇතුළුව මෙමගින් රුපියල් මිලියන 370ක පාඩුවක් සිදුවෙනවා. සමස්ත වී තොගයම මෙලෙස අලෙවි කළහොත් රජයට සිදුවන මුළු පාඩුව රුපියල් බිලියන 3ක්" යැයි ඔහු පැවසීය. මෙය වී අලෙවි මණ්ඩලයේ 55 වසරක ඉතිහාසයේ සිදුවන විශාලතම මූල්‍ය අලාභය බව ද ඔහු පෙන්වා දුන්නේය.

මෙවර කන්නයේ උතුරු සහ නැගෙනහිර පළාත්වලින් වී මෙට්‍රික් ටොන් 400,000ක පමණ අස්වැන්නක් අපේක්ෂා කළ ද, රජයේ ගබඩාවල ඉඩකඩ පවතින්නේ මෙට්‍රික් ටොන් 15,000ත් 20,000ත් අතර ප්‍රමාණයකට පමණි.

රජය වී මිලදී ගැනීම ප්‍රමාද කිරීම හේතුවෙන් කිලිනොච්චිය සහ වවුනියාව වැනි ප්‍රදේශවල ගොවීන්ට සිය වී කිලෝව රුපියල් 60ත් 75ත් අතර ඉතා අඩු මිලකට පෞද්ගලික අංශයට විකිණීමට සිදුව තිබේ. රජයේ සහතික මිල රුපියල් 120ක් වුවද, එය ගොවියාට නොලැබෙන තත්ත්වයක් උදා වී ඇත.

මහජන මුදල් අවිධිමත් ලෙස භාවිත කිරීම සහ මෙම මූල්‍ය අලාභය සම්බන්ධයෙන් 2023 අංක 9 දරන දූෂණ විරෝධී පනත යටතේ නීතිමය ක්‍රියාමාර්ග ගැනීමට ජාතික ගොවි එකමුතුව තීරණය කර ඇති බව ද සභාපතිවරයා වැඩිදුරටත් සඳහන් කළේය.