රට යලි බංකොලොත් අවදානමක.. ඩොලර් බිලියන 15ක් ඔ්නෑ.. තියෙන්නේ 07යි.. මාර්තුවෙන් IMF අවසන්..

ශ්‍රී ලංකාවේ විදේශ සංචිතය ඉදිරි වසර දෙකක කාලය ඇතුළත ඇමරිකානු ඩොලර් බිලියන 15 දක්වා ඉහළ නංවා ගැනීමට අපොහොසත් වුවහොත්, 2028 වසර අවසානයේදී මෙරට දරුණුතම ආර්ථික යුද්ධයකට මුහුණ දෙනු ඇති බව හිටපු ජනාධිපති රනිල් වික්‍රමසිංහ මහතා පවසයි.

හිටපු අමාත්‍ය රංජිත් සියඹලාපිටිය මහතා විසින් රචිත “යුද දෙකකට උර දී” ග්‍රන්ථය දොරට වැඩීමේ උත්සවයට කොළඹ බණ්ඩාරනායක සම්මන්ත්‍රණ ශාලා පරිශ්‍රයේදී එක්වෙමින් ඔහු මේ බව සඳහන් කළේය.

මහ බැංකු වාර්තාවලට අනුව මේ වසර අවසානය වන විට විදේශ සංචිත ප්‍රමාණය ඩොලර් බිලියන 8ක් දක්වා වර්ධනය වනු ඇතැයි අපේක්ෂා කළද, 2028 දී ණය ගෙවීම් ආරම්භ කිරීමට නම් එය බිලියන 15ක් දක්වා වැඩි විය යුතු බව ඔහු පෙන්වා දුන්නේය.

එහෙත් ඉතිරි ඩොලර් බිලියන 7 සොයා ගැනීම සඳහා වත්මන් රජය සතුව කිසිදු පැහැදිලි වැඩපිළිවෙළක් මෙතෙක් සකස් කර නොමැති බව වික්‍රමසිංහ මහතා මෙහිදී අවධාරණය කළේය.

පසුගිය ආර්ථික අර්බුද අවස්ථාවේදී ඉන්දියාවෙන් ඩොලර් බිලියන 4ක් සහ බංග්ලාදේශයෙන් ඩොලර් මිලියන 100ක සහාය ලැබුණු බවත්, ලෝක බැංකුව, ආසියානු සංවර්ධන බැංකුව සහ ජපානය වැනි රටවල් ලබාදුන් සහාය මත රට ස්ථාවර කළ බවත් ඔහු සිහිපත් කළේය.

2027 මාර්තු මාසයේදී ජාත්‍යන්තර මූල්‍ය අරමුදලේ (IMF) ගිවිසුම අවසන් වන බැවින්, ඉන් අනතුරුව රටේ ආර්ථිකය මෙහෙයවන ආකාරය පිළිබඳව දැඩි අවධානයක් යොමු කළ යුතු බව හිටපු ජනාධිපතිවරයා වැඩිදුරටත් පැවසීය.

ආර්ථික පරිවර්තන පනත වැනි වැදගත් නීතිමය රාමුවලින් බැහැරව කටයුතු කිරීමෙන් රට යළිත් බංකොලොත් භාවයට පත්වීමේ අවදානමක් පවතින බවත්, පාර්ලිමේන්තුව තුළ හෝ ඉන් පිටත මේ පිළිබඳව නිසි සංවාදයක් ගොඩනැගී නොමැති බවත් ඔහු මෙහිදී පෙන්වා දුන්නේය.

2028 වසරේදී එළඹෙන මෙම තීරණාත්මක ආර්ථික අභියෝගයට සාර්ථකව මුහුණ දීමට නම් විදේශ ආදායම් මාර්ග කඩිනමින් පුළුල් කරගත යුතු බව රනිල් වික්‍රමසිංහ මහතා වැඩිදුරටත් අවධාරණය කළේය.

---

Former President Warns of Economic Crisis by 2028 if Foreign Reserves Fail to Increase

Former President Ranil Wickremesinghe has issued a stark warning that Sri Lanka could face a severe economic crisis by the end of 2028 unless the country's foreign reserves reach as high as $15 billion within the next two years. His comments came during the launch of the book "Facing Two Wars," authored by former Minister Ranjith Siyambalapitiya, held at the Bandaranaike Memorial International Conference Hall in Colombo.

Wickremesinghe pointed out that while the Central Bank predicts an increase in foreign reserves to $8 billion by the end of this year, approximately $15 billion will be necessary to commence repayment of debts by 2028.

He emphasized that the current government has yet to establish a clear plan to secure the remaining $7 billion required to meet this target.

Recalling the previous economic crisis, Wickremesinghe noted that support from India amounting to $4 billion and $100 million from Bangladesh, along with assistance from the World Bank, Asian Development Bank, and Japan, played crucial roles in stabilizing the nation.

The former president further stressed the need for heightened attention on economic management once the International Monetary Fund (IMF) agreement concludes in March 2027.

He cautioned that acting outside essential legal frameworks, such as the Economic Reform Act, poses a risk of the country falling back into bankruptcy and highlighted the lack of proper discussions on this issue within Parliament or beyond.

To successfully address the impending economic challenges in 2028, Wickremesinghe urged immediate efforts to diversify foreign income sources.

*Note: In case of any discrepancy between the Sinhala and English versions, the Sinhala version shall prevail.