විභාග ප‍්‍රශ්ණ පත‍්‍ර යලි ලීක් වේ.. සමාජ ජාලවල...

 

බස්නාහිර පළාතේ පාසල්වල 11 වැනි ශ්‍රේණියේ සිසුන් සඳහා පවත්වනු ලබන පෙරහුරු පරීක්ෂණයේ ප්‍රශ්න පත්‍ර කිහිපයක් විභාගයට ප්‍රථමයෙන්ම ප්‍රසිද්ධියට පත්ව ඇති බව වාර්තා වේ. 

මෙම බරපතළ ක්‍රියාව සම්බන්ධයෙන් වහාම විධිමත් විමර්ශනයක් පවත්වන ලෙස ඒකාබද්ධ ගුරු සේවා සංගමය අධ්‍යාපන බලධාරීන්ගෙන් හදිසි ඉල්ලීමක් කර ඇත.

ඉකුත් 21 වැනිදා පැවැති ඉතිහාසය ප්‍රශ්න පත්‍රය මෙන්ම, 22 වැනිදා පැවැති චිත්‍ර, නැටුම් සහ ඉංග්‍රීසි සාහිත්‍යය යන ප්‍රශ්න පත්‍ර ද විභාගයට පෙර සමාජ මාධ්‍ය ජාල ඔස්සේ සිසුන් අතට පත්ව තිබේ.

පළාත් මට්ටමේ විභාග පමණක් නොව, උසස් පෙළ වැනි ජාතික මට්ටමේ විභාගවලදී ද මෙලෙස ප්‍රශ්න පත්‍ර පිටවීමේ සිදුවීම් වරින් වර වාර්තා වීම අතිශය කණගාටුදායක තත්ත්වයක් බව එම සංගමයේ ලේකම් අමිල සඳරුවන් මහතා අවධාරණය කරයි.

 මෙම අර්බුදකාරී වාතාවරණය පිළිබඳව අධ්‍යාපන අමාත්‍යාංශය සහ පළාත් අධ්‍යාපන බලධාරීන් ලිඛිතව දැනුවත් කිරීමට පියවර ගෙන ඇත.

අධ්‍යාපන ක්ෂේත්‍රයේ ඇගයීම් ක්‍රියාවලිය කෙරෙහි පවතින ජනතා විශ්වාසය මෙවැනි සිදුවීම් නිසා බිඳ වැටෙන බවත්, එය සමස්ත අධ්‍යාපන පද්ධතියේම පරිහානියට හේතුවන බවත් ලේකම්වරයා වැඩිදුරටත් සඳහන් කළේය. 

එබැවින්, විභාග ක්‍රමවේදයේ විනිවිදභාවය තහවුරු කිරීමටත්, වගකිවයුත්තන්ට එරෙහිව නීතිය ක්‍රියාත්මක කිරීමටත් බස්නාහිර පළාත් අධ්‍යාපන දෙපාර්තමේන්තුව වහා මැදිහත් විය යුතු බව සංගමයේ ස්ථාවරය වී තිබේ.