ගල් අගුරු විදුලි ඒකකයක් 21යි.. මදිවන විදුලිය පිටින් ගන්නවා ඒකකයක් 60 පනිනවා..- විදුලි ඇමති

 

ලංකා විදුලිබල මණ්ඩලය විසින් එළඹෙන අප්‍රේල් මස 01 වැනිදා සිට ක්‍රියාත්මක වන පරිදි විදුලි ගාස්තුවල 13.56%ක වැඩිවීමක් සඳහා මහජන උපයෝගිතා කොමිෂන් සභාවෙන් අවසර ඉල්ලා ඇති බව විදුලි බල හා බලශක්ති අමාත්‍ය කුමාර ජයකොඩි මහතා අනාවරණය කළේය. 

ඉදිරි කාලසීමාව සඳහා වන පිරිවැය පුරෝකථනයන් මත පදනම්ව මෙම ඉල්ලීම සිදු කර ඇති බව අමාත්‍යවරයා සඳහන් කළේය.

නොරොච්චෝල නිෂ්පාදනය සහ ගල් අඟුරු ප්‍රමිතිය නොරොච්චෝල බලාගාරයේ බලශක්ති නිෂ්පාදනය සෘජුවම ගල් අඟුරු වල ප්‍රමිතිය මත රඳා පවතින බව අමාත්‍යවරයා මෙහිදී පෙන්වා දුන්නේය. 

විශේෂයෙන්ම, ගොඩබෑමේ වරායේදී ලබාගන්නා වාර්තාවල සඳහන් වන කැලරිෆික් අගය අනුව බලාගාරයේ යන්ත්‍රවලින් නිපදවිය හැකි බලශක්ති ප්‍රමාණය තීරණය වේ. 

අවශ්‍ය ප්‍රමිතියට වඩා අඩු කැලරිෆික් අගයකින් යුත් ගල් අඟුරු බොයිලේරු වෙත කෙලින්ම යොමු කිරීමේදී අපේක්ෂිත බලශක්ති ප්‍රමාණය නිපදවීමට නොරොච්චෝල බලාගාරයට නොහැකි වන බව ඔහු පැහැදිලි කළේය.

මදි වන විදුලිය සහ පිරිවැය නොරොච්චෝල බලාගාරයෙන් අවශ්‍ය ප්‍රමාණයට බලශක්තිය නිෂ්පාදනය නොවන විට, විශේෂයෙන්ම රාත්‍රී කාලයේදී එම මදි වන විදුලි ධාරිතාව ලබා ගැනීමට සිදුවන්නේ ඛනිජ තෙල් ආශ්‍රිත බලාගාර මගිනි. 

මෙය  මූල්‍ය අලාභයකට හේතු වන බව පෙන්වා දුන් අමාත්‍යවරයා, ගල් අඟුරු මගින් විදුලි ඒකකයක් උත්පාදනය කිරීමට වැය වන්නේ රුපියල් 21ක් පමණ වුවද, මදි වන කොටස පියවීමට තෙල් බලාගාර හරහා විදුලිය නිපදවීමේදී ඒකකයකට රුපියල් 60කට වඩා වැඩි පිරිවැයක් දැරීමට සිදුවන බව අවධාරණය කළේය.

විපක්ෂයේ චෝදනා සහ වත්මන් තත්ත්වය විපක්ෂය විසින් ගල් අඟුරු ප්‍රසම්පාදනය සම්බන්ධයෙන් සිදු කරන අලාභය පිළිබඳ ගණනය කිරීම්, සිදුවිය හැකි නරකම තත්ත්වයන් මත පදනම් වූ උපකල්පන පමණක් බව අමාත්‍යවරයා පැවසීය. දැනට ලැබී ඇති නැව් 10න් එක් නැවක පමණක් මූලික පරීක්ෂණවලදී කැලරිෆික් අගය අඩු බව පෙනී ගොස් ඇති අතර, ඒ පිළිබඳව ස්වාධීන රසායනාගාර පරීක්ෂණයක් සිදු කිරීමට නියමිතය.

පෙබරවාරි අග වන තෙක් පසුගිය වසරේ ගල් අඟුරු තොග පවතින බැවින්, නව තොග සම්පූර්ණයෙන්ම භාවිතයට ගත් පසු මේ පිළිබඳ වඩාත් නිවැරදි දත්ත ලබාගත හැකි වනු ඇතැයිද අමාත්‍ය කුමාර ජයකොඩි මහතා වැඩිදුරටත් ප්‍රකාශ කළේය