කතානායකට හා පුද්ගලික ලේකම්ට එක ලගින් නිල නිවාස දෙකක්..

කතානායක ජගත් වික්‍රමරත්න මහතා සහ ඔහුගේ පෞද්ගලික ලේකම්වරයා වෙත කොළඹ 04 ප්‍රදේශයෙන් රජයේ නිල නිවාස වෙන් කිරීමට අදාළ ලිපි කිහිපයක් මේ වන විට සමාජ මාධ්‍ය ජාලාවල හුවමාරු වෙමින් ඇත. 

රාජ්‍ය පරිපාලන, පළාත් සභා සහ පළාත් පාලන අමාත්‍යාංශය විසින් නිකුත් කර ඇති මෙම ලිපිවලට අනුව, කොළඹ 04, ලෝරිස් පටුමඟේ අංක 3-1 දරණ රජයේ නිල නිවාසය කතානායකවරයාගේ පදිංචිය සඳහා වෙන් කර ඇත. මෙම වෙන් කිරීම 2025.01.08 වන දින සිට බලපැවැත්වෙන පරිදි සිදු කර ඇත්තේ ඔහු කතානායක ධුරය දරන කාලසීමාව සඳහා පමණක් බව එහි සඳහන් වේ. 

කතානායකවරයාගේ පෞද්ගලික ලේකම් වමීර ප්‍රියසංක ගාල්ලගේ මහතා වෙත ද කොළඹ 04, ලෝරිස් පටුමඟේම අංක 4-3 දරණ නිල නිවාසය වෙන් කර දී ඇත. 

2025.06.06 වන දින සිට බලපැවැත්වෙන මෙම වෙන් කිරීම, 2030.06.05 දින දක්වා හෝ ඔහු එම ධුරය දරන කාලසීමාව යන දෙකෙන් පළමුව එළඹෙන දින දක්වා වලංගු වන බව ලිපියෙහි දැක්වේ. 

මෙම නිවාස වෙන් කිරීම් සම්බන්ධයෙන් අමාත්‍යාංශය පනවා ඇති පොදු කොන්දේසි කිහිපයක් ද මෙම ලිපි මගින් අනාවරණය වේ

නිල නිවාස වෙන් කළ දින සිට අදාළ නිලධාරීන්ගේ වැටුපෙන් 12.5% ක මුදලක් කුලිය ලෙස අය කරනු ලැබේ. 

මෙම වෙන් කිරීම් රාජ්‍ය පරිපාලන චක්‍රලේඛ 22/2006 විධිවිධානවලට යටත්ව සිදු කර ඇත. 

විදුලිය සහ දුරකථන සම්බන්ධතා ලබා ගැනීම සඳහා ලංකා විදුලිබල මණ්ඩලය සහ ශ්‍රී ලංකා ටෙලිකොම් ආයතනය සමඟ කටයුතු කරන ලෙසත්, එම විස්තර අමාත්‍යාංශයට දැනුම් දෙන ලෙසත් උපදෙස් දී තිබේ. 

මෙම ලිපි දෙකම රාජ්‍ය පරිපාලන, පළාත් සභා සහ පළාත් පාලන අමාත්‍යාංශයේ ජ්‍යෙෂ්ඨ සහකාර ලේකම් (නිවාස හා සංවර්ධන) ජේ.ඒ.ඒ.එන්. ජයවීර මහත්මියගේ අත්සනින් නිකුත් කර ඇත.