ලෝකයේ වඩාත්ම තීරණාත්මක තෙල් ප්රවාහන මාර්ගයක් වන හෝමුස් සමුද්ර සන්ධිය මේ වන විට වසා දමා ඇති බව සහ ඒ හරහා ගමන් කිරීමට උත්සාහ කරන ඕනෑම නෞකාවකට ප්රහාර එල්ල කරන බව ඉරාන විප්ලවීය ආරක්ෂක බලකාය (IRGC) නිවේදනය කර තිබේ.
ඉරාන විප්ලවීය ආරක්ෂක බලකායේ ජ්යෙෂ්ඨ උපදේශක එබ්රහීම් ජබාරි ප්රකාශ කළේ, යම් නෞකාවක් මෙම සමුද්ර සන්ධිය හරහා යාමට උත්සාහ කළහොත් ඒවා ගිනිබත් කරන බවයි. මෙම දැඩි තීරණය ගෙන ඇත්තේ පසුගිය සෙනසුරාදා ඊශ්රායලය සහ ඇමරිකාව විසින් ටෙහෙරාන් සහ බීරූට් නගරවලට එල්ල කරන ලද බෝම්බ ප්රහාරවලට ප්රතිචාරයක් වශයෙනි.
එම ප්රහාරවලින් ඉරාන උත්තරීතර නායක අයතුල්ලා අලි කමේනි ඇතුළු ජ්යෙෂ්ඨ නිලධාරීන් පිරිසක් ජීවිතක්ෂයට පත්වූහ.
ලෝක තෙල් සැපයුමෙන් 20% ක් පමණ ගමන් කරන මෙම මාර්ගය අවහිර වීමත් සමඟ ඉදිරි දිනවලදී තෙල් බැරලයක මිල ඩොලර් 200 දක්වා ඉහළ යා හැකි බව ඉරානය අනාවැකි පළ කරයි.
මේ වන විටත් බලශක්ති මිල ගණන් සීඝ්රයෙන් ඉහළ ගොස් ඇති අතර, විශේෂයෙන් යුරෝපයේ ස්වභාවික වායු මිල 50% කින් පමණ ඉහළ ගොස් තිබේ. ඉරාන ප්රහාර හේතුවෙන් කටාර් බලශක්ති සමාගම සිය ද්රව ස්වභාවික වායු නිෂ්පාදනය ද තාවකාලිකව නවත්වා ඇත.
මේ අතර, සෞදි අරාබියේ ප්රධාන තෙල් පිරිපහදුවක් වන රස් ටැනුරා (Ras Tanura) වෙත එල්ල වූ ඩ්රෝන ප්රහාර මැඩපැවැත්වීමට සෞදි ආරක්ෂක අංශ සමත්ව තිබේ. පවතින තත්ත්වය හමුවේ ඉහළ යන බලශක්ති මිල පාලනය කිරීම සඳහා හෙට සිට විවිධ පියවර ගැනීමට බලාපොරොත්තු වන බව ඇමරිකානු රාජ්ය ලේකම් මාර්කෝ රූබියෝ ප්රකාශ කර ඇත.
