ගෑස් මිල 50%කින් දැවැන්ත ඉහල යාමක..

 

ඉරානය විසින් එල්ල කරන ලද හමුදා ප්‍රහාර හේතුවෙන් ලොව විශාලතම ද්‍රව ස්වභාවික වායු නිෂ්පාදකයා වන කටාර් බලශක්ති සමාගම (QatarEnergy) සිය නිෂ්පාදන කටයුතු සම්පූර්ණයෙන්ම අත්හිටුවීමට පියවර ගෙන ඇත.

මෙම තීරණයත් සමඟ යුරෝපයේ සහ ආසියාවේ ගෑස් මිල වාර්තාගත ලෙස ඉහළ ගොස් ඇති බව වාර්තා වේ.

කටාර් රාජ්‍යයේ රාස් ලැෆාන් (Ras Laffan) සහ මෙසායිඩ් (Mesaieed) කාර්මික නගරවල පිහිටි බලශක්ති මධ්‍යස්ථාන ඉලක්ක කර ගනිමින් ඉරානය විසින් ඩ්‍රෝන ප්‍රහාර දෙකක් එල්ල කර තිබේ. 

ඉන් එක් ප්‍රහාරයක් මෙසායිඩ් හි පිහිටි විදුලි බලාගාරයක ජල ටැංකියකට ද, අනෙක් ප්‍රහාරය රාස් ලැෆාන් හි බලශක්ති මධ්‍යස්ථානයකට ද එල්ල වී ඇත. මෙම ප්‍රහාරවලින් කිසිදු ජීවිත හානියක් සිදුව නොමැති බව කටාර් ආරක්ෂක අමාත්‍යාංශය තහවුරු කරයි.

නිෂ්පාදන අත්හිටුවීමේ නිවේදනයත් සමඟ යුරෝපයේ තොග ගෑස් මිල සියයට 50 කින් පමණ ද, ආසියානු වෙළෙඳපොළේ ගෑස් මිල සියයට 39 කින් පමණ ද ඉහළ ගොස් ඇත. 

මීට අමතරව, ලෝක වෙළෙඳපොළේ බොරතෙල් මිල ද සියයට 13 කින් පමණ ඉහළ ගොස් ඇති අතර, එය බැරලයක මිල ඇමරිකානු ඩොලර් 82 සීමාව ඉක්මවා යාමට හේතු විය. මෙය 2025 ජනවාරි මාසයෙන් පසු වාර්තා වූ ඉහළම තෙල් මිල වේ.

සෞදි අරාබියට ද ප්‍රහාර කටාර් රාජ්‍යයට අමතරව සෞදි අරාබියේ පිහිටි ලොව විශාලතම තෙල් පිරිපහදුවක් වන රාස් තනුරා (Ras Tanura) මධ්‍යස්ථානයට ද ඉරානය ඩ්‍රෝන ප්‍රහාර එල්ල කර තිබේ. ප්‍රහාරය හේතුවෙන් එහි සුළු ගින්නක් හටගෙන ඇති අතර, පූර්වාරක්ෂක පියවරක් ලෙස එහි නිෂ්පාදන කටයුතු ද තාවකාලිකව සීමා කිරීමට සෞදි බලධාරීන් පියවර ගෙන ඇත.

ඇමරිකාව සහ ඊශ්‍රායලය විසින් ඉරානයට එල්ල කරන ලද දැවැන්ත ගුවන් ප්‍රහාරවලට ප්‍රතිචාර වශයෙන් ඉරානය මෙම ප්‍රහාර මාලාව දියත් කර ඇති බව වාර්තා වේ. 

හෝමුස් සමුද්‍ර සන්ධිය හරහා සිදුවන බලශක්ති සැපයුමට මෙම ගැටුම් හේතුවෙන් දැඩි බාධා එල්ල වී ඇති අතර, එය ගෝලීය ආර්ථිකයට දැඩි බලපෑමක් එල්ල කරනු ඇතැයි ආර්ථික විශේෂඥයෝ අනතුරු අඟවති.

ඇමරිකාව, බහරේනය, ජෝර්දානය, කුවේටය, කටාර්, සෞදි අරාබිය සහ එක්සත් අරාබි එමීර් රාජ්‍යය ඒකාබද්ධ ප්‍රකාශයක් නිකුත් කරමින් ඉරානයේ මෙම ක්‍රියාව හෙළා දැක ඇති අතර තමන්ට ආත්මාරක්ෂාව සඳහා අයිතියක් ඇති බව අවධාරණය කර ඇත