ඇමරිකාවේ තෙල් පිරිපහදුවක දැවැන්ත පිපිරීමක්.. ජනතාව ඉවත් කරයි..

 ඇමරිකා එක්සත් ජනපදයේ ටෙක්සාස් ප්‍රාන්තයේ Port Arthur හි පිහිටි Valero බොරතෙල් පිරිපහදුවක දැවැන්ත පිපිරීමක් සිදුවී තිබේ.

මෙම පිපිරීමත් සමඟ අහස දෙසට කළු දුම් පටල විහිදී ගිය අතර, ප්‍රදේශයේ නිවාස සහ වාහන පවා සෙලවීමට ලක්වූ බව වාර්තා වේ.

පිපිරීම හේතුවෙන් ඇති වූ සෞඛ්‍ය අවදානම සලකා බලා, නගරයේ බටහිර ප්‍රදේශයේ පදිංචිකරුවන්ට ආරක්ෂාව පතා නිවෙස්වලටම වී සිටින ලෙස බලධාරීන් නියෝග කර ඇත.

ප්‍රදේශය පුරා සල්ෆර් ගන්ධයට සමාන කුණු බිත්තර ගඳක් පැතිර ගොස් ඇති බව ද පදිංචිකරුවෝ පවසති.

වාසනාවකට මෙන්, මෙම අනතුරින් කිසිදු පුද්ගල තුවාල ලැබීමක් වාර්තා වී නොමැති අතර, පිරිපහදුවේ සේවය කරන සියලුම සේවකයින් ආරක්ෂිතව සිටින බව වැලෙරෝ බලශක්ති සංස්ථාව තහවුරු කර තිබේ.

ජෙෆර්සන් ප්‍රාන්තයේ ෂෙරිෆ් සෙනා ස්ටීවන්ස් ප්‍රකාශ කළේ, පිරිපහදුවේ තාපන ඒකකයක ඇති වූ දෝෂයක් මෙම පිපිරීමට හේතු වන්නට ඇති බවයි.

දිනකට පෙට්‍රල්, ඩීසල් සහ ජෙට් ඉන්ධන බැරල් 435,000කට අධික ප්‍රමාණයක් නිෂ්පාදනය කරන මෙම දැවැන්ත පිරිපහදුවෙන් පිටවන දුමාරය හේතුවෙන්, බලධාරීන් දිනය පුරා වායුගෝලයේ ගුණාත්මකභාවය නිරීක්ෂණය කිරීමට පියවර ගෙන ඇත.

කෙසේ වෙතත්, නගරය සම්පූර්ණයෙන් ඉවත් කිරීමට බලධාරීන් පියවර නොගැනීම පිළිබඳව ඇතැම් ප්‍රදේශවාසීන් සිය කනස්සල්ල සහ විරෝධය පළ කර තිබේ.

ආසන්න වශයෙන් 55,000ක පමණ ජනගහනයක් වෙසෙන පෝර්ට් ආතර් නගරයේ පවතින තත්ත්වය පිළිබඳව බලධාරීන් දැඩි අවධානයෙන් පසුවෙයි