සෙනසුරාදා, ඉරිදා ඉන්ධන බෙදීම අත්හිටුවයි..

හෙට සහ අනිද්දා යන දෙදින තුළ බෙදාහරින්නන් වෙත ඉන්ධන නිකුත් කිරීමේ කටයුතු සාමාන්‍ය පරිදි සිදු නොවන බව ලංකා ඛනිජ තෙල් නීතිගත සංස්ථාව දැනුම් දෙයි. 

එබැවින් ඇණවුම් කිරීමේදී සිදුවිය හැකි ප්‍රමාදයන් මඟහරවා ගැනීම සඳහා, අදාළ චෙක්පත් සහ ඇණවුම් පත්‍රිකා පෙර දිනම තොග පර්යන්තය වෙත හෝ ඇණවුම් අංශයට ලබාදීමට කටයුතු කරන ලෙස එම ආයතනය පිරවුම්හල් හිමියන්ගෙන් ඉල්ලා සිටී.

පාරිභෝගික ජනතාවට බාධාවකින් තොරව ඉන්ධන ලබාගැනීමට හැකි වන අයුරින් අවශ්‍ය තොග පිරවුම්හල් වෙත සැපයීම සඳහා විධිමත් වැඩපිළිවෙළක් දැනටමත් ක්‍රියාත්මක කර ඇති බව සංස්ථාව වැඩිදුරටත් අවධාරණය කරයි.

මේ සම්බන්ධයෙන් අදහස් දැක්වූ කළමනාකාර අධ්‍යක්ෂ මයුර නෙත්තිකුමාරගේ මහතා සඳහන් කළේ, ලබන මැයි මාසය දක්වා ප්‍රමාණවත් තරම් ඉන්ධන තොග මෙරට සතුව පවතින බැවින් අනවශ්‍ය බියක් ඇති කරගත යුතු නොවන බවයි.