ඇමරකා බලවත්ම යුද නැව ගිනිගනී.. ඉරාන යුද්දයෙක් ඉවත් කරගනී..

 

රතු මුහුදේ මෙහෙයුම්වල නිරතව සිටියදී හටගත් ගින්නකින් හානි වූ ඇමරිකානු නාවික හමුදාවට අයත් 'USS ජෙරල්ඩ් ආර්. ෆෝර්ඩ්' (USS Gerald R. Ford) ගුවන් යානා වාහක නෞකාව, අලුත්වැඩියා කටයුතු සඳහා ග්‍රීසියේ ක්‍රීට් දූපතේ පිහිටි සූඩා බොක්ක නාවික කඳවුර වෙත පැමිණීමට නියමිතය.

මාර්තු 12 වන දින නෞකාවේ රෙදි සෝදන අංශයේ (laundry area) මෙම ගින්න හටගෙන ඇති අතර, එය පාලනය කිරීම සඳහා නාවිකයින්ට පැය කිහිපයක් ගත වී ඇත. 

ගින්න හේතුවෙන් නෞකාවේ කොටස් කිහිපයකට දැඩි හානි සිදුව ඇති බව වාර්තා වේ.

මෙම හදිසි තත්ත්වය හේතුවෙන් එක් නාවිකයෙකු තුවාල ලබා වෛද්‍ය ප්‍රතිකාර සඳහා යොමු කර ඇති අතර, තවත් දෙදෙනෙකු සුළු තුවාල ලබා ඇත.

නාවිකයින් 200කට අධික පිරිසක් දුමාරය ආඝ්‍රාණය වීම හේතුවෙන් පීඩා විඳි නමුත්, වෛද්‍ය ප්‍රතිකාරවලින් පසු ඔවුන් නැවත සේවයට වාර්තා කර ඇත.

නෞකාවේ නිදන කුටිවලට පවා දුමාරයෙන් හානි සිදුවීම නිසා, ඇමරිකාවේ වර්ජිනියා ප්‍රාන්තයේ ඇති 'USS ජෝන් එෆ්. කෙනඩි' නෞකාවේ සිට මෙට්ට 1,000ක් පමණ ප්‍රමාණයක් මෙම නෞකාව වෙත ගෙන්වා ගැනීමට පියවර ගෙන තිබේ.

නෞකාවේ රෙදි සෝදන සේවාවන් අඩාල වීම නිසා නාවිකයින් සඳහා නිල ඇඳුම් 2,000ක් පමණ අලුතින් ලබා දී ඇත.

නෞකාවේ අලුත්වැඩියා කටයුතු සතියකට වඩා වැඩි කාලයක් පවතිනු ඇතැයි ඇමරිකානු බලධාරීන් විශ්වාස කරති. 

ගින්න ඇති වීමට හේතුව පිළිබඳව මේ වන විටත් විමර්ශන ක්‍රියාත්මක වේ.

කෙසේ වෙතත්, මෙවැනි හානියක් මධ්‍යයේ වුවද, 'ඔපරේෂන් එපික් ෆියුරි' මෙහෙයුම යටතේ රතු මුහුදේ සිය රාජකාරි කටයුතු අඛණ්ඩව ඉටු කිරීමට 'USS ජෙරල්ඩ් ආර්. ෆෝර්ඩ්' නෞකාව සමත් වී ඇත.

කෙසේ වෙතත් ඉරාන හිතවාදී මාධ්‍ය පවසන්නේ ඉරාන මිසයිල ප‍්‍රහාරයක් නිසා මෙම නෞකාවට බරපතල හානි සිදුව ඇති බවය.